Presidendi Ardjan Takaj ka folur pas ndeshjes së madhe që zhvilloi ekipi i Skënderbeut një natë më parë në kuadër të Europa League, ku barazoi 1-1 me Yang Boys. Takaj shprehet i bindur se organika e ekipit është shumë e fortë dhe ka shpresë që të ecë edhe përtej fazës së grupeve. Ne kishim edhe mungesa por kjo nuk na ndaloi të luanim mirë, grupi është i bashkuar dhe nuk ka diferencime mes lojtarëve, kjo na bën të jemi më të fortë. Takaj ka prekur edhe pjesën e dy rasteve për penallti por që nuk u akorduan nga arbitri holandez.
Ishit shumë pranë fitores së parë, por skuadra nuk arriti ta ruante avantazhin deri në fund. Si e vlerësoni paraqitjen e Skënderbeut?
Mendoj se ekipi bëri një paraqitje të mirë dhe duhej ta kishim fituar këtë takim. Më pëlqeu skuadra, pavarësisht se kishim mungesa, në një kohë që na dënoi edhe dëmtimi i shpejtë i Gavazajt dhe dalja nga fusha. Megjithatë, luajtëm shumë mirë dhe duhet ta fitonim ndeshjen. Kaluam në avantazh, por më pas u ndëshkuam pas një gabimi. Gjithsesi, në nivele të tilla, edhe barazimi është shumë i mirë.
Kishte dy momente shumë të diskutueshme ku mund të ishin akorduar dy 11-metërsha për Skënderbeun. Paksa e çuditshme, të bëhen gabime në nivele të tilla, për më tepër që ka edhe gjyqtarë të linjës…
Nuk e kuptoj se pse nuk u akorduan. Një prej tyre ishte krosim nga rreth 30 metra dhe topi bie në dorën e lojtarit dhe mendoj se është penallti. Ishte një distancë e madhe, që them se duhej akorduar 11-metërsh. Edhe rasti i Ali Soues, m’u duk penallti. Mendoj se ishin të dy 11-metërsha.
Pas ndeshjeve të xhiros së dytë, duke parë edhe fitoren e Dinamos së Kievit në Beograd, besoni sërish se Skënderbeu mund të kualifikohet?
Nëse do të kishim fituar këtë ndeshje ndaj Yang Boys, do kishim shumë shanse për t’u kualifikuar. Megjithatë, aty-aty jemi në tre ekipet e tjera. Partizani është me pikë të barabarta me ne, ndërsa Yang Boys ka dy. Çdo gjë është e hapur. Por, Skënderbeu di të luajë mirë edhe jashtë, kështu që shpresat i kemi të mëdha.
Çfarë ju thatë lojtarëve pas ndeshjes?
I urova për paraqitjen e mirë që bënë. Pas fitores me Partizanin, edhe ky barazim me Yang Boys ishte shumë i mirë. Dy paraqitje të mira të skuadrës. Do më vinte mirë që të fitonim, por ky është futbolli, duhet ta pranojmë.
Ndonjë lojtar që mund ta veçoni?
Nuk mund të veçoj emra. Mua më pëlqen që funksionon grupi dhe kur çdo gjë shkon mirë, Skënderbeu është i fortë dhe merr edhe rezultate pozitive. Nëse do të luajnë vetëm 1-2 lojtarë, që të veçohen, nuk do të jetë më një skuadër e fortë. /Panorama Sport/
