Ish-ministrit të Brendshëm, Saimir Tahiri, i është mundësuar takimi me familjarët e tij, pas vetëm tri ditësh që ndodhet në qeli. Tahirin e kanë takuar familjarë dhe dy mbrojtësit ligjorë, të cilët po bëhen gati për të kryer edhe procedurat e rekursit të vendimit të Gjykatës së Apelit Kundër Korrupsionit dhe Krimit të Organizuar, që të premten i dha dënimin prej 3.4 vitesh burg. Përveç avokatëve, ka qenë edhe bashkëshortja e tij.
Tahiri, për shkak të pozicionit të punës që ka pasur, do të qëndrojë në një qeli më vete, pasi drejtuesit e burgjeve tentojnë të shmangin ndonjë përplasje me persona të botës së krimit, që mund të jenë arrestuar në kohën kur ai ka qenë ministër i Brendshëm.
Avokati mbrojtës i Saimir Tahirit, Maks Haxhia, tha në emisionin “Opinion” se trupa gjykuese nuk ka dhënë një vendim me vullnetin e saj, ndaj çështjes së klientit të tij. Sipas tij, ndaj trupës gjykuese ka pasur ndërhyrje, por nuk tha se nga kush është bërë kjo ndërhyrje.
Pjesë nga biseda në studio
Maks Haxhia: Për mua ka ndodhur diçka në momentin që ata janë mbledhur në dhomën e këshillimit për të marr vendimin. Nuk jam profeti apo symadhi që të shoh se çfarë ndodhi.
Fevziu: Ju nuk e prisnit këtë vendim?
Maks Haxhia: Absolutisht, maksimumi ne prisnim për një oportunitet vendimin e shkallës së parë. Por unë e kam të provuar. Ata që ndikuan i dolën së keqes përpara, sepse e panë si do të ishte perspektiva e kësaj çështjeje në Gjykatën e Lartë.
Fevziu: Kush ka ndikuar?
Maks Haxhia: Unë sjell argumentat që ky trup gjykues nuk ka shprehur vullnetin që i takon.
