Dashamir Shehi, i ftuar në emisionin “360 Gradë” në “Ora News”, shigjetoi policinë si të paaftë për të luftuar krimin. Ai është i bindur se trupa e policisë nuk është në gjendje që të përballet me krimin, e ndërsa pas nuk lë edhe ministrin Xhafaj, për të cilën kërkon që të lërë postin.
“Policia është bërë një trupë problematike. Nuk është në gjendje ta bëjë detyrën. Ka vite kjo punë. Ai Tahiri nuk është se qe i rrezikshëm sepse thjesht la të mbillet drogë.
Absolutisht kjo është kriminale, por sepse përdori policët për të numëruar drogën, për të numëruar parcelat, i bëri brigadierë. E përdori trupën e policisë në mënyrë kaq të hapur, sa ka pasur shkelje kushtetuese të rënda. Nëse e mbani mend, policët kur u largua, policia doli me parullë me uniforma të policisë. Thua se kjo është policia e Partisë Socialiste. Në cilin shtet mund të ndodhi kjo?!
Trupa e policisë nuk është në gjendje më të përballet me krimin. Kush është ai shqiptar i varfër, që kur të hedh në rrugë shteti, të marrë pushkën dhe t’i bie atij vrasësit që një natë përpara mund të ketë qenë duke ngrënë darkë me drejtorin e policisë, me zv/ministrin, edhe me ministrin.
Ai ministri duhet të largohet, jo se është i pazoti, jo se mund ta shtyjë i vëllai për të qenë kriminel, mjafton edhe thjesht statusi që ty të ka rënë, sepse ka humbur të drejtën të drejtojë detyrën institucionale”.
