Ish-ministri i Brendshëm, Saimir Tahiri ka mbërritur në Tiranë nga Viena, pas mesnatës së të dielës, kur avioni me të cilin ai udhëtonte, u ul në Rinas.
Automjeti i deputetit e priste atë përpara terminalit VIP, por Tahiri ka preferuar të dalë nga terminali i zakonshëm i udhëtarëve.
Teksa iu drejtuar automjetit që e priste, një gazetar i Top Channel e ka pyetur Tahirin mbi qëllimin e vizitës, duke e acaruar disi deputetin, i cili kërkoi që “t’i jepej fund kësaj estrade”.
“Zoti Tahiri mirëmbrëma, cili ishte qëllimi i vizitës suaj……….?”
“Ça bëhet kështu…..Jepini fund kësaj estrade….është komplet pa sens, pa sens”, tha Tahiri.
“Keni një koment mbi dosjen Sota….?” (Tahiri largohet)
Largimi i Tahirit nga Shqipëria shkaktoi shumë “zhurmë”, ndërkohë që Parlamenti kishte autorizuar bllokimin e lëvizjes së tij, hedh pikëpyetje mbi arsyet e Prokurorisë së Krimeve të Rënda që nuk kërkoi në gjykatë bllokimin e pasaportës.
Kjo pasi në dëgjesën në Këshillin e Rregullores, Mandateve dhe Imuniteteve, prokurorët e Krimeve të Rënda u shprehën se i druheshin daljes jashtë shtetit të Saimir Tahirit dhe prishjes së provave.
Por, ashtu siç u shpreh edhe avokati i Tahiri, prokurorët nuk kërkuan më pas bllokimin e pasaportës, duke e lënë deputetin të lirë të lëvizë sipas dëshirës.
Udhëtimi u tha se ka pasur shkak operimin e një familjari të Tahirit, por burimet për Top Channel konfirmojnë se në këtë udhëtim të premten e 17 nëntorit drejt Gjermanisë, deputeti Tahiri jo vetëm ka pasur për destinacion Hamburgun dhe jo Mynihun ku u operua familjari i tij, por ka qenë i shoqëruar nga një ish-vartës në Ministrinë e Brendshme.
Ish-ministri i Brendshëm nën hetim, nuk dha asnjë shpjegim për udhëtimin e tij dy ditor jashtë vendit dhe nuk bëri asnjë koment mbi dosjen Sota, biznesmenin 25-vjeçar, në automjetin e të cilit u gjetën mbi 860 mijë euro dhe 2 patenta lundrimi të familjes Tahiri.
