Është luajtur ditën e sotme ndeshja Tirana-Skënderbeu, e cila ka përfunduar me fitoren e korçarëve, me rezultatin 2-1
Golin e parë të ndeshjes Skënderbeu e shënon në minutën ‘18 nga Krasniqi. Goli i dytë erdhi në minutën ’87 kur Ndeki finalizoi saktë asistin e Oto Xhon. Ndërkohë goli i klubit kryeqytetas erdhi në minutat e fundit shtesë.
Pas përfundimit të ndeshjes, trajneri i Tiranës, Julian Ahmataj, ka shpërthyer në konferencë. Në një prononcim për “Supersport”, ai tha se të gjithë te Tirana, sapo vjen në krye, kërkojnë që ta heqin.
Julian Ahmataj u shpreh se i paraqitur dorëheqjen presidentit të ekipit.
“Nuk mendoj njësoj. Zhgënjim i madh ky rezultat. Erdhi nga dy tranzicione të shpejta, kur ne jemi në superioritet numerik në ato situata. Është për të ardhur keq që vijnë këto gola, dhe prishin psikologjinë e skuadrës. Shkojmë edhe deri te porta e kundërshtarit, dhe nuk godasin. Gjëra që duhen rregulluar, por çdo gjë vjen graduale. Këtu, sa vendosin një trajner, mendojnë ta heqin. Kështu nuk punohet. I kam paraqitur dorëheqjen presidentit dhe drejtorit të klubit. Nëse jam unë e keqja, mirë. Nuk ka lidhje gjendja emocionale. Të humbësh ndaj një skuadre që shkon 3 herë në portë, duke shkuar edhe më pak lojtarë ekipi tjetër, kjo është e habitshme. Më ka prerë hovin kjo gjë.
Kemi punuar 3-4 herë për ta spostuar kundërshtarin. Çdo gjë është përgatitur shumë mirë. Ndeshja ishte përgatitur në mënyrën më të mirë. Më thoni pse nuk funksionoi një goditje standarde? Kemi punuar shumë goditje standarde. Pse Muçit i ngeli të marrë përsipër? Ta ndihmojmë ne atë të ecim përpara”, tha ai.
Kështu Skënderbeu ngjitet në kuotën e 20 pikëve dhe kap Bylisin në vendin e tretë, duke lënë pas shpine Tiranën me 19 pikë.
