Superliga shqiptare luan sot një finale për titullin. Teuta-Partizani pritet të jetë ndeshja më deçizive e sezonit për vetë pozitat në tabelë që kanë skuadrat. E para pret të dytën. Diferenca 3 pikë, po aq sa të jep një fitore.
Java e 34-t e Superligës luan sot 5 takime në të njëjtin orar: 17:00
Teuta-Partizani
Tirana-Laçi
Kukësi-Bylis
Vllaznia-Kastrioti
Skënderbeu-Apolonia
Teksa kemi hyrë në fazën e verdikteve, kampionati ynë është bërë më interesant se kurrë. Luhet për çdo objektiv me një përjashtim të vogël, Apoloninë e Fierit që ka rënë matematikisht një kategori më poshtë.
Titulli është i hapur me 4 skuadra që pretendojnë vendin e parë. Diferenca mes 4 të parave është 5 pikë kur kanë mbetur dhe tre ndeshje për secilin ekip, pra 9 pikë në lojë.
1-Teuta 62 pikë
2-Partizani 59 pikë
3-Laçi 57pikë
4-Vllaznia 57 pikë
Kombinimet dhe llogaritë kanë nisur, ekipet janë me laps në dorë. Nëse Teuta mund sot Partizanin diferenca shkon në 6 pikë dhe titulli për durrsakët do të jetë pothuajse i sigurtë pasi do t’i mjaftonte 1 pikë në dy ndeshjet e fundit ose një hap fals i Partizanit.
Nëse kryendeshja e javës mbyllet në barazim, lufta shkon deri në fund e nxehtë. Një rezultat i tillë do të rifuste seriozisht në valle edhe Laçin dhe Vllazninë, në rast se këta kapitalizojnë ndeshjet e tyre.
Skenari ku Partizani mund Teutën në Durrës është ai më intriguesi. Dy të parat barazohen me pikë dhe në ndeshje direkte bilanci do të shkonte: 1 fitore Partizani dhe 3 barazime. Kjo gjë do të thotë se Partizani merr vendin e parë dhe e merr në dorë situatën. Gjithashtu Laçi dhe Vllaznia, në rast fitoresh eventuale, do të afroheshin me vetëm nga 2 pikë nga të dyja ekipet e kreut.
Përsa i përket mbijetesës, Skëndërbeu pret të arrijë një trepikësh të lehtë në Korçë pasi kundërshtari jo vetëm që është ekipi më i dobët i kampionatit (sipas shifrave) por edhe ka rënë matematikisht dhe nuk ka aq motiv sa korçarët.
Bylisi viziton Kukësin në ‘Elbasan Arena’ me misionin 3 pikë ndaj një kundërshtari që nuk ka më shanse për t’u ngjitur në renditje siç është Kukësi.
Kastrioti ka misionin më të vështirë dhe mund ta shohë veten në telashe pasi kundërshtari i tyre luan për kreun. Vllaznia do të bëjë të pamundurën për të përfituar nga përballja mes dy të parave dhe në këtë rast Kastrioti penalizohet ndjeshëm. /t.kotorri/
