Irani ka bërë një tjetër sulm kibernetik në Shqipëri, duke goditur sistemin TIMS. Tashmë është zbardhur edhe mesazhi që u shfaqej policëve në kompjuter.
“Shqipëria po vuan dhe do të vuajë ende përkrahjen që i ka dhënë iranienëve të MEK”, shkruhej në mesazh.
Sistemi i Menaxhimit të të dhënava, i njohur si sistemi TIMS, ka rënë të premten pasdite pre e një sulmi kibernetik, që krijoi vështirësi në pikat kufitare për regjistrimin e shtetasve në hyrje dhe dalje.
Në lidhje me këtë sulm reagoi sot edhe kryeministri Rama. Ai shprehej se burimi i tij ishte nga Irani, dhe se qeveria po bashkëpunon me partnerët për të mundësuar rikthimin në punë të sistemit TIMS.
Drejtoria e Krimit Kibernetik është përfshirë në hetimet që po kryhen prej mbrëmjes së djeshme, teksa një grup ekspertësh ka punuar për të rikthyer sistemin. Bashkë me të po heton edhe Anti-Terrori.
Fillimisht janë raportuar vështirësi në Pikën Kufitare të Kakavijës, aty ku situata është normalizuar disi, por jo plotësisht. Më pas sulmi ka prekur Pikën Kufitare te Kapshticës, ku regjistrimi vijon të bëhet manualisht.
