Pas kolapsit me shërbimet online qeveritare në vendin tonë, Ministria e Arsimit ka marrë vendimin që të shtyjë afatin e regjistrimeve në klasat e para dhe të dhjeta për një afat të pacaktuar, për shkak të mbylljes së përkohshme te e-Albania. Ministrja Evis Kushi garanton prindërit dhe nxënësit se kjo ndërprerje nuk do të ndikojë në procesin e regjistrimit, dhe se çdo nxënës do të ketë mbështetjen e nevojshme deri në finalizimin e procesit.
Njoftimi
Për shkak të sulmit kibernetik ndaj platformës e-Albania, e cila ndikon edhe procesin e regjistrimit për nxënësit në klasa të para dhe të dhjeta, kemi vendosur që afatin e regjistrimeve ta shtyjmë deri në një datë të pacaktuar.
Dëshiroj të garantoj prindërit dhe nxënësit se kjo ndërprerje nuk do të ndikojë aspak në procesin e regjistrimit, dhe se çdo nxënës do të ketë mbështetjen tonë të nevojshme deri në finalizimin e procesit.
Në vijim do t’ju informojmë përsëri për rihapjen e aplikimeve dhe afatet e reja të regjistrimit.
Shërbimet publike online dhe faqet qeveritare janë mbyllur përkohësisht, për shkak të një sulmi kriminal kibernetik të sinkronizuar dhe të sofistikuar nga jashtë Shqipërisë. Këtë bën me dije Agjencia Kombëtare e Shoqërisë së Informacionit (AKSHI) duke theksuar se janë detyruar të mbyllin sistemet qeveritare deri në neturalizim të sulmeve armike.
“Agjencia Kombëtare e Shoqërisë së Informacionit i bën me dije qytetarëve shqiptarë se është detyruar të mbyllë përkohësisht aksesin e shërbimeve publike online dhe faqeve të tjera qeveritare, për shkak se po përballemi me një sulm kriminal kibernetik të sinkronizuar dhe të sofistikuar nga jashtë Shqipërisë. Për t’u bërë ballë këtyre goditjeve të paprecedenta dhe të rrezikshme, jemi detyruar të mbyllim sistemet qeveritare deri në neutralizimin e sulmeve armike”, thuhet në njoftim.
