Kryeministri Rama ka mbajtur një deklaratë para Kryeministrisë për sulmet kibernetike, në platformat e qeverisë. Kreu i qeverisë ka thënë se ky është një agresion kriminal ndaj vendit tonë, i organizuar nga dy shtete. Rama tha se ka dyshime për dy shtete, por nuk dha më tepër detaje për shkak se është një çështje tejet delikate. Duke qëndruar në të njëjtën linjë, Rama sqaroi se sulmi nuk ka ndodhur nga hakera të zakonshëm.
“Kemi punuar ose më saktë skuadra e AKSHI-t ka punuar natë dhe ditë, ditë dhe natë. Do të kemi një konferencë të përbashkët, kur gjithçka të ketë përfunduar dhe skuadra speciale nga SHBA-ja të mos ketë më nevoje të qëndrojë në tryezë.
Së pari, sulmi nuk është një sulm nga hakera të zakonshëm dhe as nga grupe njerëzish të kësaj bote të errët që bëjnë shpesh herë ndërmarrje të tilla, edhe ndaj shteteve shumë më të mëdha duke bllokuar dhe sisteme kritike për të vendosur gjoba të majme. Ky është një agresion i organizuar nga një shtet.
Nuk kemi ende të gjitha provat për të përcaktuar një prej dy shteteve të dyshuara. Kjo është pjesa më delikate. Roli i disa burimeve të informacionit ka qenë destruktiv dhe i papranueshëm, për një shoqëri demokratike të informacionit”, tha Rama.
Teksa u pyet më konkretisht se cilat shtete na kanë shënjestruar, Rama refuzoi t’i përmendte. “Kemi qenë në një luftë me agresor që bombardonte nga të gjitha anët rrjetet tona në hapësirën virtuale. Nuk mund të marrim, përgojoj dy shtete. Ky sulm i fortë ka treguar forcën e sistemit tonë, është gjithçka që ndodh. Brenda kësaj fundjave, do të risistemohet pas bombardimit”, tha Rama.
