Sistemi TIMS në vendin tonë ra pre e një sulmi kibernetik nga qeveria e Iranit të premten në mbrëmje, duke shkaktuar radhë të gjata në të gjitha pikat kufitare në vend. Ky është sulmi i dytë kibernetik që Irani bën ndaj Shqipërisë.
Në lidhje me sulmet kibernetike, kryeministri Edi Rama ka zhviluar një bisedë telefonike me sekretarin e Shtetit Antony Blinken.
Ambasada Amerikane në vend, shkruan se Blinken dënon sulmin e papërgjegjshëm kibernetik të Iranit ndaj sistemit TIMS, dhe thekson rëndësinë e bashkëpunimit mes dy vendeve për sigurinë rajonale, si aleate në NATO.
“Sekretari i Shtetit Antony J. Blinken, foli dje me kryeministrin shqiptar Edi Rama. Sekretari Blinken dënoi sulmin e papërgjegjshëm kibernetik të 9 shtatorit kundër sistemeve të kontrollit kufitar të Shqipërisë, i cili pason sulmin kibernetik të Iranit ndaj Shqipërisë më 15 korrik.
Sekretari theksoi rëndësinë e bashkëpunimit SHBA-Shqipëri, si aleatë në NATO, për sigurinë rajonale”. – Zëdhënësi i Departamentit të Shtetit të SHBA, Ned Price”, thuhet në njoftimin e Ambasadës.
