Një ngjarje e rëndë është shënuar mbrëmjen e sotme në Kabul të Afganistanit, teksa brenda në një xhami ka shpërthyer një eksploziv.
Sipas mediave të huaja, sulmi në xhami ka ndodhur gjatë kohës që besimtarët po falnin namazin. Raportohet se si pasojë e sulmit kanë humbur jetën një besimtar dhe një imam i njohur i zonës, Ayaz Niazi.
“Për fat të keq, eksplozivët e vendosur nga terroristët në xhaminë Wazir Akbar Khan janë aktivizuar”, tha Tareq Arian, një zëdhënës i Ministrisë së Brendshme Afgane.
Në fillim u mendua për një sulm vetëvrasës brenda në xhami, por hetimet treguan të kundërtën.
Përgjegjësinë për sulmin nuk e ka marrë ende asnjë grup, ndërsa talibanët e dënuan vrasjen e imamit. Ndërkohë flitet edhe për të paktën tre persona të tjerë të plagosur gjatë sulmit.
