Që konsumi i tepruar i pijeve me sheqer, nuk i bën mirë shëndetit tonë, kjo nuk është asgjë e re. Mjafton vetëm të mendoni për një moment, mbi numrin në rritje të provave shkencore, se sa më i madh të jetë konsumimi i tyre, aq më i madh është rreziku nga obeziteti, prekja nga sëmundjet kardiovaskulare, diabeti, dhe për pasojë nga vdekja e parakohshme.
Tashmë një rikonfirmim i mëtejshëm i këtij zakoni të keq, vjen nga një studim i botuar në numrin e fundit të ”Journal British Medical Journal”, në të cilin studiuesit nga Agjencia Franceze e Shëndetësisë, dhe Ekipi Hulumtues i Epidemiologjisë Ushqimore (Eren), kanë vërtetuar se një rritje mesatare prej 100 mililitrash në konsumin e pijeve të ëmbla, ose lëngjeve të frutave çdo ditë, shoqërohet me një rritje prej 18 për qind të rrezikut të prekjes nga një sëmundje tumorale.
Konsumi i pijeve me sheqer
Për të kuptuar më mirë arsyen, studiuesit analizuan të dhënat nga një studim i zgjeruar francez mbi shëndetin, NutriNet-Santé në vitet 2009-2017, mbi një total prej mbi 100 mijë të rriturish, nga të cilët 79 për qind ishin gra. Pjesëmarrësit, që në fillim të studimit ishin mesatarisht 42 vjeç, iu kërkua të plotësonin pyetësorët rreth zakoneve të tyre të ngrënies, dhe konsumit prej tyre të mbi 3.000 ushqimeve dhe pije të ndryshme çdo 6 muaj (për një total prej 5 vjetësh).
Në fund të studimit, studiuesit zbuluan se mesatarisht një burrë konsumon gati 90 mililitra pije me sheqer ose lëngje frutash, që përmbajnë sheqer natyral çdo ditë. Ndërsa për gratë konsumi ishte mesatarisht 74ml në ditë. Megjithatë, të dhënat e mbledhura treguan gjithashtu se çdo rritje prej 100 ml më shumë në konsumin e këtyre pijeve, shoqërohej me një rrezik në rritje prej 18 për qind të prekjes nga kanceri, dhe në mesin e grave me një rritje prej 22 për qind të rrezikut të prekjes nga kanceri i gjirit.
Sheqeri dhe aditivët
Studiuesit, spekulojnë se midis shpjegimeve të mundshme të lidhjes, mes konsumit të pijeve me sheqer dhe tumoreve, mund të ketë efekti negativ i sheqerit që gjendet në këto pije mbi mëlçinë, pankreasin dhe gjakun në përgjithësi, që mund të lidhet me një rrezik në rritje të tumoreve.
Ose tek përbërësit e tjerë kimikë, siç janë aditivët. Gjithsesi, kujtojmë që tani për tani këto janë vetëm hipoteza, dhe se ky është një studim vëzhgimor. Prandaj ai nuk tregon një marrëdhënie shkak-pasojë, por më tepër një lidhje midis konsumit të pijeve të ëmbla, dhe një rreziku më të madh për t’u prekur nga tumoret.
Studiuesit saktësojnë se do të duhen testime të mëtejshme, me studime më të gjera, për t’i konfirmuar këto rezultate. “Këto të dhëna, mbështesin rëndësinë që kanë rekomandimet ekzistuese mbi dietat ushqimore, për të kufizuar konsumin e pijeve me sheqer, apo dhe politikat qeveritare si taksimi dhe kufizimi i marketingut që reklamon pijet me sheqer, të cilat mund të kontribuojnë potencialisht në uljen e rasteve të tumoreve”- përfundojnë hulumtuesit./ TIRANA TODAY
Denonco ne TT