Prindërit këshillojnë gjithmonë fëmijët që ta nisin ditën duke ngrënë diçka. Një orar i paracaktuar i vakteve, i respektuar çdo ditë përmirëson tretjen. Në të njëjtën kohë ka shumë ndikim në mbarëvajtjen e metabolizmit i cili përshpejtohet, duke ndihmuar në ushqyerjen në sasi më të vogël, në mënyrë që të mbani peshën nën kontroll.
Një studim ka dalë në konkluzionin se ngrënia e akullores në mëngjes, na bën më të zgjuar. Referuar studimit të realizuar në Japoni, njerëzit që hanë akullore në mëngjes, i përpunojnë informacionet më shpejtë dhe kanë një kohë më të shkurtër reagimi.
Një shkencëtar japonez ka vërtetuar tezën se një kupë akullore në mëngjes, mund të përshpejtojë të gjitha proceset e trurit. Eksperimenti i kryer nga Yoshihiko Koga, një profesor në Universitetin e Kyorin në Tokio, konsistonte në ngrënien e tre lugëve me akullore sapo zgjohesh nga gjumi.
Njerëzit që morën pjesë në eksperiment, iu nënshtruan më pas një testi me ushtrime logjike. Profesor Koga zbuloi se njerëzit që kishin ngrënë akullore, ishin shumë më të shpejtë në përpunimin e informacionit sesa njerëzit që nuk kishin konsumuar asgjë në mëngjes.
Ai ka matur gjithashtu valët e trurit gjatë eksperimentit, dhe rezultoi se valët alfa përgjegjëse për përqendrimin dhe koordinimin e lëvizjeve, ishin rritur ndjeshëm tek njerëzit që kishin ngrënë akullore.
