Një studim i ri, ka zbuluar se njerëzit që hanë më shumë vezë, kanë një rrezik më të lartë të prekjes nga sëmundjet e zemrës, dhe për pasojë të vdekjes së parakohshme. Studiuesit besojnë se kjo ndodh për shkak të kolesterolit që gjendet tek veza.
Ky përfundim, bie në kundërshtim me mendimin që ka dominuar deri tani, sipas të cilit kolesteroli në ushqime nuk përbën ndonjë arsye për t’u shqetësuar, pasi është konsumi i yndyrave të ngopura (që gjendet tek gjalpi, djathi dhe mishi), ai që e rrit më shumë nivelin e kolesterolit në trupin e njeriut.
Edhe pse njerëzit që vuajnë nga sëmundjet e zemrës, ishin paralajmëruar të mos konsumonin shumë vezë, udhëzimet në Britaninë e Madhe në lidhje me ushqimin e shëndetshëm, nuk rekomandojnë një kufi të caktuar, mbi sasinë e kolesterolit që duhet të konsumojmë.
Studiuesit kanë publikuar rezultate nga një studim i madh, që lidh konsumin e vezëve me një rrezik të rritur të sëmundjeve të zemrës dhe vdekjes prej tyre. Studiuesit e Universitetit Veriperëndimor në Çikago, mblodhën të dhëna nga 6 studime të kryera më herët në SHBA, që përfshinin në total 29.615 njerëz.
Këto studime ishin vëzhguese, pra ato grumbullonin informacione për dietat e njerëzve, dhe monitoronin të dhënat e tyre shëndetësore, në vend se t’u kërkonin njerëzve të ndiqnin një dietë të caktuar. Në fillim të studimeve, njerëzve u kërkohej të jepnin informacione të detajuara në lidhje me dietat e tyre ushqimore, duke përfshirë edhe numrin e vezëve që konsumojnë në një ditë.
Në SHBA, ku dhe u krye studimi, një vezë e madhe përmban 186 miligram kolesterol (në Britani ajo përmban 235 mg). Por pjesëmarrësit, dhanë gjithashtu edhe informacione të tjera në lidhje me stilin e tyre të jetesës, apo edhe sa herë ushtrohen fizikisht në javë. Shëndeti i tyre u monitorua mesatarisht prej 17.5 vjet. Një amerikan konsumon mesatarisht rreth 295 mg kolesterol në ditë, përfshirë 3-4 vezë në javë.
Studimi zbuloi se për secilën gjysmë veze të konsumuar në ditë, njerëzit kishin një rrezik prej 6 për qind më të lartë të prekjes nga sëmundjeve kardiovaskulare, dhe një rrezik 8 për qind më të lartë të vdekjes gjatë 17 viteve e gjysmë të studimit. Për të zbuluar nëse kolesteroli në vezë, mund ta shpjegojë këtë lidhje, studiuesit analizuan konsumimin e kolesterolit të njerëzit veç e veç. Për çdo 300 mg shtesë të kolesterolit të konsumuar në ditë (nga vezët, mishi dhe produktet e qumështit me yndyrë të lartë), pjesëmarrësit kishin një rrezik 17 për qind më të lartë të zhvillimit të sëmundjeve kardiovaskulare, dhe një rrezik prej 18 për qind më të lartë të vdekjes prej tyre.
Kur studiuesit, krahasuan rreziqet që lidhen me konsumimin e vezëve dhe të kolesterolit, ata zbuluan se përmbajtja e kolesterolit në vezë, shpjegonte pikërisht rritjen e rreziqeve të vërejtura tek konsumi i vezëve. Kjo sugjeron që kolesteroli në vezë, ka të ngjarë të shkaktojë rrezikun e shtuar që vërehet me konsumimin e vezëve.
Udhëzimet për ushqimin në Britaninë e Madhe, rekomandojnë të hani vezët, si pjesë e një diete të shëndetshme dhe të ekuilibruar, pasi ato janë një burim i mirë i proteinave dhe vitaminave. Por studiuesit sugjerojnë që gjetjet e tyre, të merren parasysh në rekomandimet e reja mbi dietën e shëndetshme ushqimore.
Viktoria Tejlor, dietologe në Fondacionin Britanik të Zemrës, thotë:“Ka pasur shumë debate mbi rolin e vezëve tek sëmundjet e zemrës, dhe ato të qarkullimit të gjakut. Ky studim, sugjeron që njerëzit që konsumojnë më shumë vezë, janë më të rrezikuar nga sëmundjet e zemrës, për shkak të kolesterolit që ndodhet në to”.
Gjithsesi, ky lloj studimi mund të tregojë vetëm një lidhje, dhe duhen më shumë kërkime në këtë fushë, për të kuptuar arsyet që fshihen pas kësaj lidhje. Tejlor mendon se ushqimi i shëndetshëm, ka të bëjë me ruajtjen e ekuilibrave. “Nëse jeni duke ngrënë shumë nga një lloj ushqimi, kjo lë më pak hapësirë për ushqime të tjera, nga të cilat mund të kemi më shumë përfitime shëndetësore.
Vezët janë shumë ushqyese. Ky studim, fokusohet në sasinë e vezëve që hamë. Por akoma më e rëndësishme, është mënyra se si gatuhen vezët. Për shembull, vezët e ziera shumë pak, në ujë të valë, janë një vakt shumë më i shëndetshëm, sesa skuqja e tyre tradicionale në tigan”./ TIRANA TODAY
