Procedurat si futja ose heqja e tubave të frymëmarrjes tek një pacient, të cilat mendohej se përbëjnë një rrezik serioz të transmetimit të Covid-19 tek punonjësit e shëndetësisë, prodhojnë më pak aerosole sesa një kollitje normale, sipas një studimi të ri të botuar të martën.
Një shqetësim i veçantë për mjekët dhe infermierët gjatë pandemisë, ka qenë se intubimi – procedura kur vendoset një tub në rrugët e frymëmarrjes së pacientit, për ta ndihmuar ata të marrë frymë, mund të krijojë një mjegull të imët grimcash virale, dhe të krijojë kësisoj një rrezik për infektimin e personelit spitalor.
Kjo i kishte nxitur autoritetet shëndetësore në Britani t’i klasifikonin intubimet si “procedura gjeneruese të aerosolit”, gjë që do të thotë se punonjësit e stafeve spitalore kanë nevojë për aparatet e frymëmarrjes dhe pajisje mbrojtëse personale të nivelit të lartë, teksa sallat e operacionit duhet të pastrohen duke përdorur një teknikë të veçantë për të hequr aerosolët.
Studiuesit thonë se përdorimi i kësaj teknike, e ka ngadalësuar punën në sektorin e kirurgjisë, duke sjellë krijimin e një listë të gjatë të pritjes nga pacientët.
Por një studim i ri i botuar në “Anaesthesia”, revista e Shoqatës së Anestezistëve Britanikë, zbuloi se si intubimi ashtu si edhe heqja e tubit të frymëmarrjes pas operacionit, prodhojnë shumë më pak aerosole sesa ishte supozuar më parë.
Ndërsa kërkimi nuk u krye tek pacientët me Covid-19 për arsye sigurie, autorët nga Universiteti i Bristolit dhe spitalet në Bristol dhe Bath, kërkuan rivlerësimin e niveleve të rrezikut të këtyre procedurave.
“Rezultatet sugjerojnë se futja e tubit të anestezisë, nuk duhet të konsiderohet një procedurë me një rrezik të lartë”- thanë autorët e studimit. “Ne nuk zbuluam asnjë rritje të grimcave të aerosolizuara gjatë ventilimit me maskë në fytyrë, apo përpjekjeve të përsëritura të intubimit”-shkruan ata. “Kjo pasqyron praktikën tipike klinike nga ana e anestezistët me një sërë përvojash, duke ofruar siguri të mëtejshme në lidhje me nivelin e ulët të gjenerimit të aerosolit”.
Më të rrezikshme janë kollitjet
Studiuesit punuan për të përcaktuar sasinë e aerosoleve të gjeneruara gjatë procedurave të ndryshme të anestezisë, nga futja dhe heqja e tubave nga rrugët e frymëmarrjes së pacientëve, si dhe mjete të tjera ndihmëse të frymëmarrjes, në mjediset spitalore.
Ata vëzhguan 19 procedura futje në intim dhe 14 të heqjes së tubave, dhe konstatuan se përkundër pritshmërive se futja në intubim gjeneronte afërsisht të një të mijtën e aerosolit të gjeneruar nga një kollitje e vetme.
Heqja e tubit prodhoi më shumë aerosol, veçanërisht kur shoqërohej me një kollë të dobët, e cila ndonjëherë ndodh kur pacientët rifillojnë të marrin frymë vetë. Por studiuesit thanë se kjo ishte ende më pak se 25 për qind e asaj të prodhuar nga një kollitje e vullnetshme.
Autorët vërejnë se studimi i tyre ishte i kufizuar, pasi ata nuk ishin në gjendje të studionin drejtpërdrejt rrezikun e transmetimit të koronavirusit të ri, duke shtuar se “interpretimi i tyre qëndron në lidhjen e pranuar gjerësisht, midis gjenerimit të aerosolit dhe rrezikut të infektimit”.
Ata thanë se ky studim mund të ketë ndikim në shpërndarjen e pajisjeve mbrojtëse në spitale, e cila ndahet në bazë të asaj se sa e rrezikshme konsiderohet një situatë e caktuar.
Burimi i lajmit: https://medicalxpress.com/news/2020-10-covid-intubation-risky.html
Përshtatur nga TIRANA TODAY
