Në shenjë proteste, dhe pas thyerjes së ultimatumit për plotësimin e tetë kushteve nga kryeministri Edi Rama, një pjesë e studentëve kanë vijuar protestën gjatë gjithë natës, në të ftohtë.
Të vendosur për të çuar deri në fund objektivat e tyre, shumë studentë vendosën të kalojnë natën pranë godinës së Kryeministrisë, duke sfiduar temperaturat e ftohta të dhjetorit, deri në minus gradë celsius.
Të mbuluar me batanije, ata kanë qëndruar pranë njëri-tjetrit në shenjë proteste gjatë natës poshtë zyrës së Ramës. Sikundër duket qartë edhe nga fotot në fjalë, ata janë survejuar gjithë kohës nga efektivë policie.
Studentët kanë paralajmëruar sot përshkallëzim të protestave të tyre, pasi kërkesat e tyre ende nuk janë plotësuar, ndërsa afati që i vendosën qeverisë përfundoi dje në orën 16:00.
Ata protestojnë për përgjysmimin e tarifave për të gjitha ciklet e studimit, përfaqësimin e studenteve në senatin e akademik dhe bordet e universitetit, si edhe rritjen e investimeve për përmirësimin e kushteve në konvikte dhe bibloteka.