Ministri i Brendshëm, Sandër Lleshaj reagoi sot pas akuzave të Bashës, teksa ky i fundit e cilësoi ministrin si një nga personat që ndihmojnë Ramën dhe zbatojnë urdhrat e tij.
Lleshaj shkroi në një postim se Basha është përgjegjës për çdo individ që aktivizon kundër ligjit dhe lirive politike në vend, teksa paralajmëroi se “kush u përgjigjet thirrjeve për paligjshmëri, do të përballet me ligjin”.
Në lidhje me këtë paralajmërim të bërë nga ministri, ka reaguar ish-deputeti i PD-së, Gent Strazimiri duke i rikujtuar Lleshajt ligjin, i cili parashikon që dekreti i Presidentit pas botimit të tij në Fletoren Zyrtare është i detyrueshëm për të gjithë.
“…ky dekret i botuar zyrtarisht dhe ligjërisht në Fletoren Zyrtare, është “urdhri” i Republikës, është betimi, është “Atdheu, nderi, detyra”, të cilin deri në momentin që nuk e ka shfuqizuar Gjykata Kushtetuese, e ke të detyrueshëm për zbatim”, shprehet Strazimiri.
Ish-deputeti i rikujton ministrit se është detyra e tij të sigurojë zbatimin e ligjeve dhe jo t’i sfidojë ato duke e paralajmëruar se ai po shkel “betimin ndaj Republikës”.
Reagimi i Strazimirit:
Llesh!
Që ta dish ti, “Ai” dhe “subjektet zgjedhore”:
Kjo është “Fletorja Zyrtare” e Republikës së Shqipërisë!
Këtu botohen AKTET LIGJORE të Republikës, TË DETYRUESHME PËR ZBATIM së pari nga ti, “Ai” dhe pastaj nga “subjektet zgjedhore”!
Ti paguhesh që të sigurosh zbatimin e tyre, jo t’i sfidosh e as t’i kundërshtosh me shkrim a me gojë!
Meqenëse luan vazhdimisht “oficerin”, po ta them edhe “oficershe”: ky dekret i botuar zyrtarisht dhe ligjërisht në Fletoren Zyrtare, është “URDHRI” i REPUBLIKËS, është BETIMI, është “ATDHEU, NDERI, DETYRA”, të cilin deri në momentin që nuk e ka shfuqizuar Gjykata Kushtetuese, e ke TË DETYRUESHËM PËR ZBATIM!
Ndryshe shkel “BETIMIN” ndaj REPUBLIKËS, dhe pasojat ligjore të këtij veprimi ti i di vetë…
Hesapin që pastaj do kesh me popullin që ka lexuar dhe mban në dorë Fletoren Zyrtare, LIGJIN e REPUBLIKËS, s’ta bëj dot unë…
