Gjykata e Strasburgut i ka dhënë urdhër të prerë shtetit shqiptar që të ndalojë procedurat e ekstradimit të turkut, Selami Simsek drejt Turqisë. Masa e sigurimit të padisë iu është komunikuar palëve ditën e sotme.
Vendimi është marrë pas lëvizjeve që ka kryer avokati i Simsek, Elton Hyseni, i cili ka përcjellë për në Strasburg dëshmitë e turkut. Ky i fundit ka treguar se familjarët e tij janë dënuar për shkak se janë mbështetës të Fehtullah Gylen.
Pas shqyrtimit të kryer, Gjykata e Strasburgut, urdhëron autoritetet shqiptare që mos ta dëbojnë, derisa të përfundojnë procedurat gjyqësore për Simsek.
Simsek është konsideruar nga Presidenti turk, Rexhep Taip Erdogan, si pjesë e gylenistëve që organizuan grushtin e shtetit në Turqi në korrik 2016. Ai u arrestua më 8 korrik të 2019-ës, për falsifikim dokumentash.
Simsek tentoi që të largohej drejt Kanadasë me dokumenta të falsifikuara nëpërmjet aeroportit të Rinasit. Gjatë arrestimit, atij iu sekuestra pasaporta false. Së bashku me të, u arrestua edhe mësuesi Harun Çelik, i cili u ekstradua drejt Turqisë.
