Lënia jashtë kombëtares e gardianit kuqezi të Lazios, Thomas Strakosha ka habitur opinionistët, pasi ishte duke kaluar një formë fantastike. Opinionisti Gëzim Sinemati, është i mendimit se Panucci po gabon gjithçka por është i qetë për sa kohë që ka mbështetjen e kreut të FSHF-së. Sipas tij, kërkesa e tepruar e disiplinës është e pakuptimtë në një moment kur ai nuk arrin të prodhojë atë që kërkon publiku, një përfaqësuese dinjitoze.
“Strakosha? I kanë dhënë urdhër të humbë avionin, që të luajë tjetri. Si e humb avionin e kombëtares ai, nuk e humb kurrë me Lacion, as me Kievon. I ndodh vetëm me kombëtaren.
Panuçi ka shumë dobësi, se ka një lloj politike se nuk bën as miq, nuk i bën lojtarët. Kështu si sillet Panuçi, njerëzit duan më shumë De Biazin, ai ishte më pranë futbollistit. Ky ka lidhje me Dukën, nuk ka nevojë për futbollistët. Ai i prek të gjitha e nuk mban përgjegjësi, në asnjë vend nuk do të mbahej një trajner kështu 2 vite e gjysmë. Këtë e mbajnë. Këto do dëgjojmë histori tjetër se trajnerin e mban presidenti dhe t’i gëzohemi kësaj pune.
Disiplina e orarit është e vogël në krahasim me disiplinën në fushë. Njerëzit janë të interesuar sa ka disiplinë në fushë. Një trajner që nuk po tregon disiplinë në fushë, nuk ka fytyre të na kërkojë disiplinën jashtë. Servilat me dorë lart thanë se erdhi për disiplinë, është e shtata herë që vijnë të huajt e na thonë disiplinë. Ne kishim disiplinë sa ishim në Europian, sa mbaroi Europiani u kthyem në origjinë”, tha Sinemati.
