Greqia është nën një shtetrrethim të pjesshëm, ku vendi mbyllet nga mesnata deri në orën 5 të mëngjesit. Aktualisht spitalet janë të tejmbushur me të infektuar, ndërsa mjekët duket se janë dorëzuar para këtij realiteti të trishtë. Për shkak të rasteve të shtuara, spitalet në Greqi po përballen me një mungesë të shtretërve.
Gadishulli i Atikës, i cili përfshin edhe kryeqytetin e Greqisë, rezulton të ketë mbushur 70 për qind të vendeve në spitale, me raste të prekura nga COVID-19. Ndërkohë, pjesa tjetër e rajonit grek raportohet të ketë zënë rreth 45 për qind të vendeve në spitale. Parashikimet janë që të kenë 4000 raste në ditë deri për Krishtlindje. Kjo do të ishte e pamundur për mjekët.
Shumica e klinikave spitalore janë të detyruara të mbyllen e të shndërrohen në salla me shtretër, ku të infektuarit mund të trajtohen. Ekspertët thonë se sezoni i gripit mund ta përkeqësojë situatën.
“Rritja e numrit të personave me COVID-19 është aq e madhe, saqë nëse verifikohen studimet epidemiologjike, atëherë ne do të kemi nga 4000 raste në ditë deri për Krishtlindje. Është e pamundur që të përballohen 4000 raste, pavarësisht sa ne përpiqemi. Nëse mjekët i kalojnë kapacitetet e tyre, prapë nuk do të jemi në gjendje t’ia dalim”, tha Matina Pagonis, kryetarja e unionit të mjekëve.
“Ne gjithashtu, po hyjmë në disa muaj që do të kemi më shumë të infektuar. Në nëntor, dhjetor dhe janar, do të ekspozohemi ndaj një derivati të gripit të derrit, kështu që së bashku me këtë situatë është e vështirë që spitalet të veprojnë. Ne duhet të shohim se çfarë mund të bëjmë në mënyrë që të shmangim skenarët që pamë në Europë dhe Amerikë, ku mjekët vendosnin kush hynte në intubim dhe kush jo”, deklaron Pagonis.
