Elisa Spiropali u ka kërkuar anëtareve të PS-së dhe shqiptarëve një mandat të tretë qeverisje me në krye Edi Ramën. Ajo e artikuloi këtë kërkesë në mbledhjen e sotme në Parkun Olimpik të Tiranës, takim që hap siparin për zgjedhjet brenda PS-së më 16 Nëntor.
“Në janar presim të kemi një proces të jashtëzakonshëm me të gjithë prurjet e reja për të zgjedhur Asamblenë dhe strukturat drejtuese. Kjo është gjysma e punës që na duhet për mandatin tonë të tretë në 2021, me Edi Ramën kryeministër dhe PS si mazhorancë. Është i rëndësishëm ky mandat për të vazhduar rrugën tonë. Çdo kthim mbrapa do të ishte jo vetëm i dëmshëm, por fatal për Shqipërinë”, tha Spiropali.
Sipas saj rruga e zgjedhur nga PS-ja është rruga e transformimit.
“Ne zgjodhëm rrugën e përballjes me të vërtetë, rrugën e transformimit të drejtësisë, rrugën e punës të luftës kundër informalitetit. Ne zgjodhëm të jemi një qeveri e përgjegjshme, jo për brezin që shkoi, po për brezat që do të vijnë dhe që duan një Shqipëri Evropiane. PS nuk e ka qëllim në vetvete pushtetin, por e ka mjet për të transformuar jetët e njerëzve, për të ndryshuar mendësitë, për të transformuar qytetet. Mjafton të hedhësh sytë në Tiranë, për të cilin mund të themi se është qyteti më i mirë në rajon”- tha ajo.
Spiropali ka vënë në dukje tranformimin që ka sjellë projekti i Rilindjes Urbane transformoi në shumë nga qendrat tona. Gjithashtu tha se tranformimi do të jetë i prekshëm së shpejti dhe në Kavajë dhe Kamëz, me kryebashkiakun e ri.
“Më 30 qershor ne nuk votuam vetëm për të zgjedhur kryebashkiakët, se ato do t’i zgjidhim edhe me PD përballë, por ne votuam për të thënë se Shqipëria është shtet dhe askush nuk mund ta marrë peng. Asnjë forcë e errët nuk mund të marrë peng procesin demokratik dhe të hedhë në erë të ardhmen, ndaj ndërkombëtarët na mbështetën”- theksoi ajo, duke shtuar se “Është kjo arsyeja pse prej shtatorit ne kemi nisur procesin e jashtëzakonshëm të riorganizimit të PS në çdo qelizë”.
