Spanjë/ Sa e kishim pritur një sezon të tillë

Dje u luajt në Spanjnë derbi i Madridit, një luftë e egër mes dy rivalësh kalibri. Barazimi 1-1 i ardhur në minutën e 88, kur Benzema-ja “anuloi” kafshimin e Suarezit në fraksionin e parë, pasoi fitoren komode të Barcelonës një ditë më parë (mundi Osasunën me rezultatin 0-2).

Rezultatet e fundjavës por sidomos ecuria e harlisur e Atletikos, në këtë vit të ri kalendarik, në La Liga e kanë kanalizuar “luftën civile” në Spanjë në një garë me tre. Tri kuaj të dëshpëruar për trofeun. Një garë që nuk e shihnim prej të paktn 5 vitesh kaq të hapur në Spanjë.

Më shumë se sezoni 15/16 kur ekipet e mbyllën në një diferencë prej tre pikësh në tri vendet e para të klasifikimit (1-Barça 91, Reali 90 dhe Atletiko 88 pikë), në mendje të vijnë pasazhet e sezonit 13/14 kur njëjtë si tani: Atletiko kryesoi duke triumfuar në fund dhe njëjtë si tani ekipet ishin aq ngjeshur sa pas ndeshjes së fundit tabela ishte kjo:

-Atletiko Madrid 90

-Barcelona 87

-Real Madrid 87

Për koincidencë i njëjti rend dhe në emra. Deja vu!

Kush mendonte dhe mendon ende se Atletiko e ka fituar La Ligën gabohet. E thotë vetë “Cholo” Simeone :” Duhet punë e vazhdueshme, ndeshjet një e nga një”. Mbetet shumë ligë. Dhe pas derbit është e qartë se do të jetë emocionuese deri në fund. Duke filluar nga e enjtja kur Atletiko pret baskët e Bilbaos për të shlyer raundin e 18, të prapambetur, duke u barazuar në ndeshje të luajtura me Realin e Barçën (26), do të mbeten dhe  12 ndeshje për secilin. 36 pikë për tu fituar.

Është momenti për të shijuar rrugëtimin.  Tri kuaj dhe 26 kilometra rrugë, më e mira mbetet ende për t’u përjetuar.