Partia Socialiste do të garojë në zgjedhjet parlamentare të 25 prillit me sloganin ‘’Shqipëria e ardhmja jonë’’, për të kërkuar një mandat të tretë qeverisës.
Në orën 19:30, pritet të mblidhet Kryesia e PS për të përcaktuar listen e plotë të kandidatëve për deputetë.
Sot në mesnatë skadon afati për dërgimin e listave të kandidatëve për deputetë nga partitë politike në Komisionin Qendor të Zgjedhjeve, por më herët gjatë ditës së sotme, në Partinë Socialiste ka patur lëvizje surprizë.
Kryetari i Bashkisë së Vlorës, Dritan Leli refuzoi propozimin e kryeministrit Edi Rama për të kandiduar si deputet në zgjedhjet e 25 prillit, duke mos pranuar që të jepte dorëheqjen.
Ndërkohë, deputeti Musa Ulqini refuzoi kandidimin në qarkun e Elbasanit, pasi emri i tij ndodhej në një vend jo të sigurtë në listë.
Gjithashtu, Rama njoftoi sot largimin nga Partia Socialiste të Eglantina Gjermenit, e cila pason Vasilika Hysin, Besnik Barajn dhe Sadi Vorpsin.
