Spanja ka shënuar një tjetër rekord sa i përket numrit më të lartë të vdekjeve të shënuara në vend, brenda 24 orëve.
Sipas mediave vendase, 864 persona kanë ndërruar jetë në 24 orët e fundit, duke e çuar në 9,053 numrin total të viktimave të shënuara nga koronavirusi.
Ndërkohë deri më tani, më shumë se 102 mijë persona janë prekur nga koronavirusi në Spanjë, shifër kjo e cila nuk është arritur as nga Kina, ku edhe u regjistrua përhapja e kësaj epidemie.
Bëhet me dije se në 24 orët e fundit janë shënuar 7,719 raste të reja me virusin COVID-19, ose 1,500 më pak se numri i të prekurve se një ditë më parë.
“Çështja kryesore nuk është më nëse kemi arritur pikun apo jo, duket sikur jemi atje. Çelësi i çështjes është të sigurohemi që sistemi shëndetësor kombëtar është i aftë të garantojë mbulimin e duhur të të gjithë pacientëve tanë dhe t’u ofroj atyre trajtim”, tha shefi i urgjencës së vendit, Fernando Simon.
Më shumë se 22 mijë persona janë shëruar nga virusi vdekjeprurës, i cili i ka marrë jetën 45,277 personave nga e gjithë bota.
Numri më i madhe i vdekjeve nga COVID-19 është shënuar në Itali (13,155), më pas vjen Spanja, ndërsa e treta renditet SHBA (4,373).