Publikohen vendimet e marra ditën e djeshme në mbledhjen e Këshillit të Ministrave, dhe ajo çfarë bie në sy është përcaktimi i buxhetit fillestar për SPAK, për vitin 2019, plot 150 milion lekë.
Sipas këtij vendimi, shifra e përcaktuar do të jetë në dispozicion për të gjitha shpenzimet e mundshme, në kuadër të aksionit për Reformën në Drejtësi.
SPAK-u do të ngrihet në muajin shtator dhe pritet të hetojë korrupsionin në nivele të larta drejtuese, përfshirë këtu edhe fushën e politikës.
Vendimi i miratuar në mbledhjen e Këshillit të Ministrave:
V E N D I M PËR PËRCAKTIMIN E BUXHETIT FILLESTAR TË STRUKTURËS SË POSAÇME KUNDËR KORRUPSIONIT DHE KRIMIT TË ORGANIZUAR
Në mbështetje të nenit 100 të Kushtetutës, të pikës 10, të nenit 57, të ligjit nr.95/2016, “Për organizimin dhe funksionimin e institucioneve për të luftuar korrupsionin dhe krimin e organizuar”, me propozimin e ministrit të Drejtësisë dhe të ministrit të Financave dhe Ekonomisë, Këshilli i Ministrave
V E N D O S I:
Strukturës së Posaçme kundër Korrupsionit dhe Krimit të Organizuar i përcaktohet për vitin 2019 buxheti fillestar prej 150 000 000 (njëqind e pesëdhjetë milionë) lekësh, për përballimin e shpenzimeve lidhur me ushtrimin e aktivitetit gjatë vitit 2019.
Ngarkohen Struktura e Posaçme kundër Korrupsionit dhe Krimit të Organizuar dhe Ministria e Financave dhe Ekonomisë për ndjekjen e procedurave për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
