Ish-ministri i Drejtësisë Ylli Manjani, gjatë një intervistë në emisionin “Zona Zero”, ka deklaruar se SPAK-u po arreston njerëz pa patur asnjë provë në lidhje me çështjen e inceneratorëve. Sipas tij, për Lefter Kokën dhe Alqi Bllakon nuk ka asnjë provë që i lidh ata me korrupsionin. Manjani shtoi më tej se Lefter Koka është arrestuar dhe po mbahet në burg për interesa të Ilir Metës, duke qenë kundërshtari i tij.
Ai shpjegoi se SPAK-u goditi Lefter Kokën, duke e konsideruar “peshku i madh” deri tani, pasi ishte kundërshtari i Ilir Metës. Sipas tij, ai është futur në burg pa prova. Madje Manjani është i mendimit se Lefter Koka është në burg për hakmarrje politike. Dhe se SPAK-u nuk ka hetuar ndaj Kokës dhe Bllakos, akuzat ndaj tyre vijnë nga LSI-ja.
“SPAK po arreston njerëz tek inceneratorët, si me drejtësi popullore, pa patur asnjë provë. SPAK nuk ka marrë asnjë në pyetje për inceneratorët, por i ka futur direkt në burg. SPAK ka futur në burg njerëz për inceneratorët, sikur këta janë terroristë. Në fillim SPAK-u duhet ti merrte në pyetje ata, partia se t’i arrestonte.
SPAK-u goditi Lefter Kokën, se ai mund të quhet peshku i madh deri tani, sepse ishte kundërshtari i Ilir Metës. E denoncoi Meta edhe Rama tha meqënëse ky do që të futet njeriu i tij në burg, le të futet. Por, ai është futur në burg pa prova. Lefter Koka është burg për hakmarrje politike. SPAK nuk ka hetuar ndaj Kokës dhe Bllakos, akuzat ndaj tyre vijnë nga LSI.
Korrupsioni ka dy palë një të korruptuarin dhe një që korrupton. SPAK deri tani nuk ka asnjë provë që i lidh biznesmenët me Lefter Kokën. Ai po mbahet kot në burg. SPAK u bë që të hetonte gjatë me përgjime dhe t’i kapte me presh në duar, por sot s’ka asnjë provë për korrupsionin apo të korruptuarin.
SPAK dhe Ambasada Amerikane kanë degraduar sistemin e drejtësisë. Nëse këto gjëra do ndodhnin në Amerikë, këta të SPAK-ut duhet të ishin sot në burg për arrestimin e njerëzve pa prova. Nuk ka asnjë standard minimialist në hetimet që po bën SPAK-u. Unë kam qenë mbështetës i SPAK-ut që vepron ngadalë dhe i sigurtë, por jo kështu.
Nuk mund të mbash në burg njerëz pa prova. Nuk mund ta mbash dikë në burg se kështu mendon dikush. Nuk ka lidhje me personin, por me standardin me drejtësinë. Edhe nëse do ishte Edi Rama, të njëjtën gjë do thoja. Drejtësia popullore është një katastrofë. Drejtësia duhet të bazohet në prova dhe fakte.
Ku u morën lekët dhe ku u çuan? Asnjë prej 8 kompanive nuk ka pranuar se ka lidhje me Lefter Kokën. Këtej gjen evazion fiskal dhe këtej ia faturon Lefterit si korrupsion. I thonë ke pastruar produktet e krimit, në radhë të parë cilat janë. Më duket si një histori e stisur. Ne kemi qenë në një qeveri. Të njëjten gjë mendoj se edhe Saimir Tahiri se po bën burg kot se SPAK-u nuk pati këllqe ta dënonte për atë që duhej të ishte dënuar.
LSI ka heshtur për aferat e mëdha, nuk kuptohet qëllimi që pasur me inceneratorët. Një parti politike që ka bashkëqeverisur me socialistët, siç është LSI, duhet të mbajë përgjegjësi për atë që ka ndodhur.
Të denoncosh njeriun që ke çuar dje ministër dhe për më tepër pa prova. Drejtësia duhet t’i injorojë këto gjëra. Se nuk ka si qëllim që të kënaqë popullin. Tani drejtësia duhet të vendosë pikat mbi “i”. Për atë që ka prova t’i bëjë mirë burgu, të tjerat janë makinacione politike”, tha Manjani.
