Referuar hetimeve të nisura nga SPAK ndaj kreut të Partisë së Lirisë, Ilir Meta, kreu i PD-së Sali Berisha thotë se dënon me forcë këto akte të cilat i cilëson si akte të shëmtuara të regjimit të Ramës. Sipas Berishës, Rama i tmerruar nga fati i afërt që e pret, ka shkrirë Shërbimin Informativ, Komisionin e Dosjeve të Sigurimit të Shtetit, SPAK-un, duke i shndërruar në aneks të zyrës së tij. Madje Berisha shkon më tej duke paralajmëruar Ramën se nuk ka manipulim, shpifje apo falsifikim që do e shpëtojë nga ndëshkimi i rëndë popullor.
Ja se çfarë shkruan Berisha
Edi Rama, je i pashpresë!
Këto javët e fundit, i tmerruar nga fati i afërt që e pret për vjedhjet e mëdha që u ka bërë shqiptarëve, gjykimi dhe ndëshkimi popullor për vjedhjet e mëdha me aferat e djegësve, portit të Durrësit, Butrinit me prokurimet sekrete, PPP, bordet e çmimeve stratosferike dhe aferat e tjera që mbajnë firmën e tij, Edi Rama ka shkrirë në një të vetëm Shërbimin Informativ, Komisionin e Dosjeve të Sigurimit të Shtetit, SPAK-un e partisë dhe i ka shndërruar në aneks të zyrës së tij.
Me qëllimin e vetëm fabrikimin, falsifikimin, manipulimin e paskrupullt të pseudo-fakteve, pseudo-dokumenteve për kundërshtarët politikë, në rastin konkret kundër kryetarit të Partisë së Lirisë, Ilir Meta.
Duke dënuar me forcën më të madhe këto akte të shëmtuara të regjimit mafioz të Edi Ramës, të bazuar në dhunimin e votës së qytetarëve, vjedhjen e papermbajtur te pasurive dhe fondeve publike, drogën dhe krimin, i them vasalit të Aleksander Vuçiç-it se je i pashpresë dhe se, nuk ka manipulim, shpifje apo falsifikim as dhe ligj i votuar nga mazhoranca kallpe që do të shpëtojë ty nga ndëshkimi i rëndë popullor.
Ti dhe shteti yt mafioz njëpartiak do të keni fundin e merituar! Sb
Kryetari i Partisë së Lirisë, Ilir Meta ka reaguar dje ashpër, pasi Prokuroria e Posaçme ka nisur hetimin për të, pas kallëzimit të ish-deputetit të opozitës Halit Valteri, që e akuzonte për lobim me para, që sipas tij, i kishte përfituar përmes korrupsionit.
Meta ka ndarë shkresën në rrjetet sociale, që drejtuesi i SPAK, Arben Kraja i ka dërguar Drejtorisë së Përgjithshme të Gjendjes Civile, ku i kërkon informacion mbi gjeneralitetet e ish-Presidentit të Republikës. Në reagimin e tij, Meta sulmon Krajën dhe e akuzon si partiak, ndërsa paralajmëron se drejtësia po vjen.
