Prokuroria e Posaçme Anti-Korrupsion, SPAK, ka nisur hetimet për ish-Presidentin Ilir Meta. Prokuroria e Posaçme kundër Korrupsionit dhe Krimit të Organizuar i ka kërkuar informacione zyrtare KQZ-së, për formularin e dekriminalizimit për Metën.
Në një letër të firmosur nga drejtuesi i SPAK, Arben Kraja, i kërkohet Komisionit Qëndror të Zgjedhjeve që të dorëzojnë një kopje të vetëdeklarimit apo të formularit të Dekriminalizimit të Ilir Metës, kur ky i fundit ka qenë deputet përpara se të zgjidhej President.
Hetimi i SPAK për Ilir Metën bëhet pas kallëzimit penal të bërë disa muaj më parë nga ish-deputeti i PD-së Halit Valteri, i cili e ka akuzuar për “korrupsion aktiv dhe pasiv”, “fshehje pasurie”, “mospagim të taksave e tatimeve” dhe “shpërdorim detyre”.
Pas kësaj letre ka reaguar Ilir Meta në Facebook, ku ka postuar një foto dhe shkruan:
“Meqënëse spurdhjaku i partisë ka vendosur t’i shërbejë hapur mafies së inceneratorëve në panik, ju lutem njihuni edhe me një kërkesë tjetër serioze për karagjozët më të mëdhenj të Ramaformës. Shtatori po vjen dhe Drejtësia e Popullit nuk do ndalet më!
Ramoviçin asgjë nuk e shpëton dot më!”
