Ndonëse Prokuroria e Posaçme Kundër Korrupsionit dhe Krimit të Organizuar, SPAK, i ka sekuestruar llogaritë bankare mjekut kardio-kirurg Edvin Priftit, ai ia ka dalë të përballojë koston e pushimeve në Greqi. Mjeku po shijon pushimet në Prevezë të Greqisë, në një nga resortet më luksoze. Ai nuk e ka menduar dy herë, por ka ikur për pushime, ndonëse është nën hetim për “korrupsion”. Edvin Prifti është duke festuar në shoqërinë e deputetes së Kukësit, Gerta Duraku.
Prokuroria vendosi zgjatjen e afateve të hetimeve për një periudhë gjashtë mujore për Priftin, pasi ai u lirua nga burgu. Prifti doli nga përgjimet që po kryheshin në Gjykatën e Krujës, ku u arrestua dhe u la në burg gjykatësja Enkeleida Hoxha.
Kardio-kirurgu është nën hetim prej muajsh, për “korrupsion” e “pastrim parash”, pasi ra në ‘rrjetën’ e përgjimeve teksa Prokuroria hetonte rastet e korrupsionit në Gjykatën e Krujës, operacion gjatë të cilit u vu në pranga gjyqtarja Enkeleida Hoxha. Sekretarja e këtij institucioni fliste për ryshfet për operacionin e nënës së saj, dhe për para që do t’i jepte Priftit. Për këtë arsye, mjeku u pezullua fillimisht nga detyra, dhe më pas u vu në pranga.
Gjetja e më shumë se gjysmë milioni euro në shtëpi e në zyrë, kqyrja e telefonit dhe e lap-topit i bëri prokurorët e SPAK që të zgjeronin hetimet dhe të ngrinin dyshimet për përfshirjen e mjekut në të tjera veprimtari të dyshimta.
Kontrollet në banesën e mjekut zbuluan se ai kishte 250 mijë euro cash dhe 160 milionë lekë të vjetra. 50 mijë euro të tjera dhe 3 mln lekë iu gjetën në zyrë, para për të cilat avokatët pretenduan se ishin në çantën e Priftit, gati për t’i dërguar në bankë.
Mjekut në banesë i është gjetur një bllok, ku shkruante emrat e pacientëve dhe paratë që kishte marrë prej tyre. Në këtë bllok varionin shuma të shënuara që shkonin nga 1 mijë deri në 10 mijë, por nuk dihet ende nëse bëhej fjalë për lekë apo euro.
