Nënkryetari i Partisë Demokratike Edmond Spaho përmes një postimi në rrjetin social Facebook, shprehet se shteti nuk është në gjendje të vendosë rregull në këtë periudhë pandemie.
“Qeniet humane edhe kur nuk kanë arsye, janë të prirura të mos i respektojnë rregullat. Prandaj është krijuar policia që të mbajë rendin dhe të sigurojë respektimin e ligjeve dhe rregullave. Por policia jonë rri dhe ha fara”, shkruan ndër të tjera Spaho.
Reagimi i tij i plotë: “Burg, burg, burg…përse KM ynë kërcënon njerëzit? Nëse njerëzit dalin dhe sipas KM nuk kanë halle, do të thotë që shteti i tij nuk është në gjendje të vendosë rregull.
Qeniet humane edhe kur nuk kanë arsye, janë të prirura të mos i respektojnë rregullat. Prandaj është krijuar policia që të mbajë rendin dhe të sigurojë respektimin e ligjeve dhe rregullave.
Por policia jonë rri dhe ha fara. Përse i kërcënon qytetarët me arkivole, luftë, ferr, vdekje dhe nuk shkarkon drejtorin e policisë ose Ministrin e Brendshëm për paaftësi në kryerjen e detyrave në kohë pandemie?
Përse në Shkodër na thua që fajin e ka opozita ngaqë Kryetare Bashkie është nga opozita dhe në Tiranë dhe Durrës nuk qenkeni fajtore ju të maxhorancës që drejtoni edhe pushtetin vendor edhe atë qendror?
Çfarë duhet të bëjë Kryetarja e Bashkisë kur nuk ka asnjë autoritet mbi organet ligjzbatuese. Një propozim që bëri për heqjen e dy tarifave për dy muaj, ja rrëzoi këshilli yt bashkiak të cilin ti e kontrollon 100%”.
