Ambasadori i BE-së në Tiranë, Luigi Soreca, ka përcjellë një mesazh të fortë sa i takon rrugës evropiane të Shqipërisë. Soreca shkruan në “Twitter” se angazhimi i BE për integrimin e Shqipërisë mbetet i palëkundur. Kryediplomati apelon ndaj autoriteteve shqiptare, që të përqendrohen në procesin e reformave, si e vetmja rrugë që do ta çojnë Shqipërinë në destinacionin e saj.
“Angazhimi i BE për integrimin e Shqipërisë mbetet i palëkundur. BE do të vazhdojë të mbështesë fuqishëm rrugën evropiane të Shqipërisë, për të sjellë popullin shqiptar në familjen që i përket.
Autoritetet shqiptare duhet të vazhdojnë të përqendrohen në procesin e reformave, e vetmja rrugë që do ta çojë Shqipërinë drejt destinacionit të saj. Jo për BE, por për Shqipërinë dhe për të gjithë qytetarët e saj, për përparimin e vendit drejt standardeve më të larta sa i përket demokracisë dhe ligjit”, shkruan ai.
