Ambasadori i Bashkimit Evropian në Shqipëri, Luigi Soreca, ka reaguar një ditë pasi gjykata caktoi vendimin për Tahirin. Ai ka kërkuar kohë që të lexojë vendimin e gjykatës, e më pas të japë mendimin e plotë të asaj se çfarë ka ndodhur.
“Duhet të lexoj vendimin e gjykatës, pastaj të jap një mendim të plotë. Më jepni kohë të njihem me vendimin, dhe pastaj të jap një mendim të plotë”, tha Soreca.
Kujtojmë këtu se mbrëmjen e djeshme, gjykata e shpalli ish-ministrin të fajshëm vetëm për veprën penale “korrupsion të zyrtarëve të lartë”, duke hedhur poshtë dy akuzat e tjera: “trafik të lëndëve narkotike kryer në bashkëpunim”, dhe “grup të strukturuar kriminal”.
Për shkak të gjykimit të shkurtuar, Tahiri përfiton uljen e një të tretës dhe dënimi i shkon në 3 vjet e katër muaj burg. Por, ai nuk do të shkojë asnjë ditë në qeli, pasi gjykata ka vendosur të pezullojë ekzekutimin e dënimit të tij me burg, duke e lënë në shërbimin e provës për një periudhë 3 vjeçare.
