Tirana Today në fillim të kampionatit Botëror publikoi një sondazh për tifozët shqiptarë, të cilët mund të votonin se kush ekip do të fitonte trofeun. Botërori i Rusisë ka qenë i mbushur me plotë surpriza, por në fund kanë shkuar dy ekipet që e kanë merituar më shumë dhe i kanë dhënë emocione këtij eventi.
Shqiptarët kanë votuar dhe rezultatet janë këto, 59.26% mendojnë se do të jetë Kroacia kampione e Botës, ndërsa 40.74% shohin Francën kampione.
Ndërsa në një sondazh të publikuar vetëm një ditë më parë në “Facebook”, ku kanë votuar mbi 500 veta diferenca është më e madhe. 79% e shqiptarëve mendojnë se Kroacia do të shpallet kampione bote, ndërsa vetëm 21% favorizojnë Francën.
Mbetet për tu shijuar finalja e Botërorit e cila do të zhvillohet të dielën me fillim në 17:00 në Moskë. Kroacia ka qenë surpriza në këtë Kupë Bote, pasi doli e para në grup me tre fitore ku përballë kishte Argjentinën, Nigerinë dhe Islandën. Më pas filloi spektakli i vërtetë. Tre ndeshje përballë Rusisë, Danimarkës dhe Anglisë kanë luajtur nga 120’ minuta. Vetëm tek Anglia nuk u ekzekutuan penalltitë, pasi ishte Mandzukic ai që shënoi për kroatët në minutën e 109’ dhe i kualifikoi në finale, ndërsa në dy sfidat e tjera heroi i tyre ishte portieri Subasic.
Franca nga ana tjetër në grup nuk kishte ndonjë ekip “big”, ndërsa në fazën me eliminim direkt u përball menjëherë me Argjentinën e Lionel Messit, ku fitoi edhe zemrat e tifozëve. Një super ndeshje e cila përfundoi 4-3 dhe ishte Mbappe që bëri diferencën. Më pas përballë do të kishin Uruguain, por mungesa e Cavanit tek amerikano-latinët e bëri më të thjeshtë fitoren për francezët. Në gjysmëfinale zhvillohet një përballje mes talenteve më të mirë në qarkullim. Franca mposht Belgjikën që kishte eliminuar Brazilin me një gol të Umtitit dhe prek finalen e madhe.
