Kryetari i Bashkisë së Durrësit, Vangjush Dako ka përveshur mëngët për të kandiduar për një tjetër mandat, pasi po konsumon tre të tillë. Ambicia e Dakos për një mandat të katërt duket mjaft qartë. Ndryshe nga kryebashkiaku i Elbasanit, Qazim Sejdini i cili ka vendosur të mos kandidojë më, Dako po kërkon tashmë “PO-në” e Ramës për t’u përballur sërish me të djathtët.
“Pas çdo suksesi në Bashkinë e Durrësit, qëndron kryeministri Edi Rama. Kemi bërë shumë, por ka ende për të bërë”, deklaroi para pak ditësh kryebashkiaku në një takim me qytetarët, me praninë e kryeministrit.
Takim ky, ku Dako priste edhe shpalljen e kandidaturës së tij për këtë bashki nga kryeministri Rama, gjë që nuk ndodhi. Ky i fundit e ka vlerësuar punën e Dakos, por duket se nuk është i bindur për rikandidimin e tij, duke mos thënë asnjë emër konkret.
Duket se një mandat i katërt për Dakon do të ishte i tepërt, teksa në fakt ishte vetë Partia Socialiste që propozoi pak kohë më parë që të ndalohej rikandidimi i kryebashkiakëve që kanë konsumuar 3 mandate.
Por, Komisioni Qendror i Zgjedhjeve ka rrëzuar propozimin e Partisë Socialiste për moskandidimin e kryebashkiakëve që kanë 3 ose më shumë mandate. Kështu, ky vendim i hap sërish rrugë rikandidimit të Dakos në Durrës, apo Xhelal Mziut në Kamëz.
Tashmë, kryebashkiaku i Durrësit ndodhet në ‘siklet të madh’, pasi kryeministri me gjasë do sjellë një personalitet të ri, kjo ndoshta edhe për shkak të akuzave të shumta të së djathtëve për lidhjen e Dakos me grupin e “Avdylaj”, sidomos pas publikimit të përgjimit të VOA-s, që zbulojnë rolin e krimit të organizuar në blerjen e votave në Shqipëri.
Por, çfarë mendojnë shqiptarët: A duhet që Dako të kandidojë për një mandat të katërt, apo ai tashmë është një personalitet i konsumuar dhe ka ardhur koha që Partia Socialiste të sjellë dikë tjetër për qytetin bregdetar?
Në një sondazh të bërë nga Tirana Today, shumica e votuesve mendojnë se Partia Socialiste duhet të kandidojë me një tjetër personalitet në zgjedhjet lokale për bashkinë e Durrësit, dhe jo me Dakon.
Pyetjes se “A duhet të rikandidohet Dako për një mandat të katërt në Durrës?”, votuesit e këtij sondazhi iu përgjigjën kështu:
25% (287 vota) – PO
75% (852 vota) – Jo, duhet një prurje e re
Të kënaqur ose me jo me punën e Dakos në Durrës, ajo që duket qartë është fakti se shqiptarët mendojnë se tashmë është koha që ai ‘ta hapë krahun’ dhe t’ia lërë kandidimin një tjetër personaliteti në Partinë Socialiste. Por, mbetet të presim nëse kryeministri Rama mendon njësoj si qytetarët, apo do i japë një tjetër mundësi kryebashkiakut Vangjush Dako për një tjetër kandidim./ TIRANA TODAY
