Kryedemokrati Basha, ka reaguar pas debatit në Komisionin Hetimor për Inceneratorët, ku Partia Socialiste paralajmëroi se do të kallëzojë në SPAK, Jorida Tabakun. Basha thotë se kryeministri Rama dhe PS po bëjnë gjithçka për t’i ikur drejtësisë, dhe po përpiqen ta pengojnë dhe të largojnë vëmendjen nga puna e madhe që ka kryer Jorida Tabaku me Komisionin Hetimor për inceneratorët.
Jorida Tabaku është kallëzuar në SPAK, nga përfaqësuesit socialistë në Komisionin Hetimor për Inceneratorët. Ky kallëzim ka ardhur pas takimit të Tabakut me kreun e SPAK, Arben Kraja. Felaj tha se Tabaku shkeli ligjin kur pati një takim me kreun e SPAK, pasi ajo nuk mund të shkojë me iniciativën e saj dhe të takojë Arben Krajën.
“Edi Rama dhe PS po bëjnë gjithçka për t’i ikur drejtësisë. Ata po përpiqen ta pengojnë dhe të largojnë vëmendjen nga puna e madhe që ka kryer Jorida Tabaku me Komisionin Hetimor për inceneratorët.
Ne nuk do të tërhiqemi, por do të vazhdojmë të vendosur punën për të zbuluar gjithçka, deri në fund.
Shqiptarët e dinë që qeveria ka shumë për të fshehur, dhe që ky komision po i zbulon dita ditës se si ata kanë vjedhur 430 milionë euro.
Ne inkurajojmë prokurorët të bëjnë punën e tyre dhe i bëjmë thirrje Ramës dhe PS që të mos nervozohen, ndonëse duket qartë se pse kanë gjithë arsyet e botës për t’u frikësuar”.
