Socialistët kanë nënshkruar sot Marrëveshjes së Mirëkuptimit ndërmjet Grupit Parlamentar të Partisë Socialiste, Sekretarit të Përgjithshëm të PS dhe ministrave në mbledhjen e grupit parlamentar të PS-së.
Gjatë fjalës së tij, Taulant Balla ka dhënë detaje lidhur me këtë marrëveshje, e cila ka për qëllim llogaridhënien e ministrave tek deputetët dhe baza.
Sipas disa prej pikave të marrëveshjes, deputeti i çdo zone është i detyruar që një herë në muaj të shkojë pranë qarkut që përfaqëson dhe të dëgjojë nga shqetësimet e bazës, ndërsa ministri do të ndjekë të njëjtin ritual një herë në vit.
Ashtu sic kishte njoftuar edhe kryeministri, detyrën e Koordinatorit Kombëtar për bashkëqeverisjen me njerëzit ia ka besuar ish-ministrit Saimir Tahiri.
Kreu i grupit parlamentar të PS, Taulant Balla, tregoi detyrat e ngarkuara të secilës palë me nënshkrimin e marrëveshjes:
“Kjo është një marrëveshje mirëkuptimi që do firmoset nga tre palët sot. Kjo marrëveshje ka disa angazhime të të tre palëve.
Secila prej tyre angazhohet:
-të bashkëpunojë pa ndërprerje për të rritur cilësinë e procesit demokratik dhe bashkëjetesës politike në Kuvendin e Shqipërisë dhe jashtë tij
-për të zgjeruar bazën e shumicës, qeverisjen në komunikim dhe bashkëpunim të vazhdueshëm me qytetarët në çdo komunitet
-për të ruajtur dhe forcuar lidhjen me elektoratin dhe anëtarësinë e Partisë Socialiste
-për t’iu përgjigjur në kohë shqetësimeve e ankesave të njerëzve dhe familjeve të zakonshme
-për të vendosur përpara përgjegjësisë në kohë reale çdo zyrtar që identifikohet në shkelje të së drejtës së qytetarit për të marrë një shërbim apo rezulton në shkelje të etikës publike
-për të dekurajuar çdo formë nepotizmi e klientelizmi partiak në emërime dhe për të reaguar vendosmërisht ndaj çdo rasti ku konstatohen këto fenomene
-për të ruajtur e forcuar kohezionin e brendshëm duke fuqizuar debatin
-për të kontribuar në nivel kolektiv e individual në ushqimin e një klime besimi, respektimi reciprok
-për të mbështetur nismat ligjore dhe reformat e ndërmarra nga qeveria
-për t’iu përgjigjur me përkushtim njerëzor dhe seriozitet maksimal detyrimeve të këtyre çështjeve,” tha Balla.
