Evis Kushi do të jetë kryetarja e re e Partisë Socialiste në Elbasan. Sekretari i Përgjithshëm i PS-së Taulant Balla ka organizuar Asamblenë e Socialistëve në Elbasan, të cilët kanë marrë vendimin për kryetaren e re.
Gjatë fjalës së tij, Balla vuri në dukje prioritetin e qeverisë për këtë vit: rindërtimin e shtëpive të dëmtuara nga tërmeti.
“Viti i ri 2020 që sapo ka nisur është viti i rindërtimit, i ringritjes pas dëmeve të shkaktuara nga tërmeti. Brenda vitit 2020, çdo familje jashtë qytetit që ka humbur banesën individuale do të hyjë në një banesë të re. Po ashtu deri në gjysmën e parë të vitit 2020, duhet të jenë ngritur në qytetet e prekura, të gjitha kantieret e lagjeve të reja”- tha Balla.
Sipas tij, ky vit është historik për vendin tonë, si kryesuese e OSB-së. Ai ka gjetur rastin të tregojë dhe risinë e sjellë nga qeveria këtë vit, aplikimet online.
“Viti 2020 ka nisur me revolucionin digjital në të gjitha shërbimet publike. Vetëm pak minuta online në kompjuter apo celular, duke klikuar vetë nga kudoqoftë (brenda ose jashtë vendit) ose me një ndihmë të parë në sportelet zyrave të postës të njësive administrative mund të kryen procedurat e nevojshme që deri dje kërkonin kohë e mund zyrë më zyrë. Sa shumë kanë vuajtur qytetarët për tu endur zyrave dhe radhëve pafund për të marrë një dëshmi penaliteti, madje duke fut mik apo duke pagu ryshfet për ta marrë shpejt. Ky proces rrënjësisht transformues do të lehtësojë ndjeshëm edhe për biznesin duke eleminuar endjen, pritjen, arrogancën në raste të caktuara të zyrtarëve”- tha Balla.
