Prej ditësh, LSI vijon fushatën e anëtarësimeve të reja, ku një pjesë e konsiderueshme e tyre vijnë edhe nga radhët e Partisë Socialiste. Por ky fakt nuk është pritur aspak mirë nga pala kundërshtare.
Deputetja socialiste, Elona Gjebrea, reagoi dje për njësinë një në kryeqytet, duke deklaruar se socialistët e vërtetë janë ata që kanë ideale, dhe jo ata që rendin për të ndërruar ombrellën e partisë sa herë kanë zgjedhje.
Në kundërpërgjigje të këtij qendrimi, kryetarja e LSI-së, Monika Kryemadhi thotë se PS ka dështuar. Për vetë zonjën Gjebrea, risolli fabulën “Dhelpra dhe rrushtë”.
“Statusi i zonjës Gjebrea ka ardhur si rezultat i dështimit të një tentative tjetër të drejtorëve të bashkisë së Tiranës, duke i kërcënuar këta socialistë që duan të çlirohen nga kapja. Pasi nuk ju eci metoda e kërcënimit, bënë një status që jeni të panevojshëm për ne.
Sekti i Rilindjes që ka ozurpuar PS, nuk ka nevojë më për socialistët, i donte për t’ju marrë pushtetin, nuk i konsideron më ata. Përkundrazi i quan të dështuar, të humbur. Socialistët që po i bashkohen LSI e gjejnë veten. Do të përmed fabulën “Dhelpra dhe rrushtë”, pasi dhelpra nuk arrinte të kapte rrushin, thoshte është i papjekur. Edhe historia e statusit të zonjës Gjebrea nuk është gjë tjetër. Këta socialistë duhen të shkëputen nga zhinxhirët e kapjes së karrierës së tyre politike. LSI jo vetëm i ka të hapur dyert për çdo socialist, por për çdo qytetare dhe qytetarë që edhe nëse nuk e sheh veten pjesë të një flamuri politik, mund ta gjejë veten e tij, mund të jetë vendimmarrës dhe politikbërës”.
