Duket se ka marrë fund tensioni i qytetarëve në të dyja pikat e kalimit kufitar, në Kapshticë dhe në Kakavijë, pasi është arritur marrëveshja mes palës shqiptare dhe asaj greke.
Lajmin e ka bërë me dije ministrja e Mbrojtjes, Olta Xhaçka, e cila thekson se duke filluar nga nesër nis kufizimi i ri nga pala greke.
Në lidhje me këtë situatë kaotike ka reaguar Kreu i Shtetit, Ilir Meta, i cili apelon se shqiptarët nuk mund të trajtohen si njerëz pa atdhe dhe pa shtet.
Meta ka kërkuar informim me transparencë dhe realizimin falas të tamponëve për Covid-19 për qytetarët që presin në pikën kufitare të Kakavijës.
Statusi
Qytetarët shqiptarë, të cilët prej ditësh ndodhen në pikën e kalimit kufitar të Kakavijës, në kushte tejet të vështira dhe në prag të një krize humanitare, nuk mund të trajtohen si njerëz pa Atdhe dhe pa shtet.
Përsëris thirrjen e fortë drejtuar qeverisë shqiptare për të qëndruar pranë qytetarëve dhe për të marrë të gjitha masat, për informimin me transparencë, realizimin FALAS dhe në vendin ku ndodhen të tamponëve për COVID-19.
Kontaktet me Greqinë të jenë konstante dhe vetëm në funksion të një zgjidhjeje të menjëhershme.
Aktet e forcës janë të papranueshme!
I kërkoj autoriteteve greke, që në respekt të frymës së fqinjësisë së mirë dhe lidhjeve të forta tradicionale mes dy popujve, të bëjnë të pamundurën për zgjidhjen e situatës, imazhet e së cilës turpërojnë të dyja vendet.
ÇDO QYTETAR I REPUBLIKËS SË SHQIPËRISË MERITON TË TRAJTOHET ME DINJITET! ??
