Është arrestuar shoferi i furgonit, i cili ditën e djeshme aksidentoi nxënësit teksa po i transportonte për në shkollë, ku si pasojë e aksidentit mbetën të plagosur 10 nxënës, një prej të cilëve u transportua në Spitalin e Traumës Tiranë.
Policia e Skraparit ka bërë të ditur se shoferi Astrit Hysi është arrestuar për akuzën shkelje të rregullave të qarkullimit.
Njoftimi i policisë:
“Më datë 12.03.2018, nga Specialistët e Seksionit për Qarkullimin Rrugor u bë arrestimi në flagrancë i shtetasit Astrit Hysi, 52 vjeç, banues në fshatin Vërzhezhë, Skrapar.
Arrestimi i tij u bë pasi, në rrugën dytësore Vërzhezhë – Çorovodë, në vëndin e quajtur “Kthesa e Minos”, duke drejtuar mjetin tip Benz autobuz, me targa AA 245 KE humbi kontrollin e mjetit dhe doli nga rruga duke u përmbysur në përrua, ku për pasojë u lënduan nxënësit që udhëtonin me këtë automjet”, sqaroi policia.
