Kreu i Shtetit, Ilir Meta, ka dhuruar gjak në ndihmë të talasemikëve. Ai e ka cilësuar këtë akt një domosdoshmëri në këto momente, teksa ka falenderuar ata që i janë përgjigjur thirrjes së tij. Situata e rëndë, shkaktuar nga COVID-19, ka bërë që personat në nevojë, veçanërisht ata talasemikë, të mbeten pa transfuzion gjaku duke rrezikuar kështu shëndetin e tyre.
Sa i takon masave të marra nga qeveria, Meta tha se kjo është një krizë e re, ndërsa u bëri thirrje qytetarëve të respektojnë kufizimet, pasi situata nuk përballohet vetëm me mjekë dhe infermierë.
“Çdo sjellje e pakujdesshme, mund të rezultojë fatale. Nuk kemi nevojë për të bërë eksperimente. Është e rëndësishme të respektohen të gjithë udhëzimet e autoriteteve të shëndetit publik dhe kufizimet. Kufizimet nuk duhen konsideruar si privim, por mbrojtje e domosdoshme në këto momente kritike”.
