Një skenë dramatike e fiksuar përmes pamjeve tregon sesi arkivolet me viktimat e COVID-19 në Turqi, ngarkohen në autobusë. Kjo është thuajse e ngjashme me atë se çfarë ndodhi në valën e parë të pandemisë në Itali, ku mjetet e ushtrisë ishin në radhë me arkivolet e viktimave.
Këto pamje të rënda që po bëjnë xhiron e rrjetit, janë filmuar nga një qytetar me celularin e tij. Mediat raportojnë se një autobus i është afruar disa çadrave në Stamboll, dhe më pas arkivole me trupa të pajetë nga COVID-19, ngarkohen në të.
Mediat vendase bëjnë me dije se fotot që po qarkullojnë në internet dhe janë bërë virale, i japin rastin Kryetarit të Komunës së Stambollit dhe kundërshtarit politik të Erdoganit, të flasë në lidhje me gjendjen reale për rrjedhën e pandemisë së COVID-19, e cila deri më tani nuk është bërë publike.
Ministri i Shëndetësisë, Fahrettin Koca, në deklaratën që bëri pas mbledhjes së Këshillit Shkencor, ku u diskutua situata aktuale e pandemisë, tha se do të publikohet çdo ditë edhe numri i rasteve asimptomatikë.
Ministria e Shëndetësisë njoftoi të enjten në mbrëmje se 174 pacientë të tjerë kanë humbur jetën në 24 orët e fundit nga koronavirusi i ri në Turqi, duke e çuar numrin total të vdekjeve në 13.014.
“Numri i përgjithshëm i rasteve të konfirmuara me koronavirus është rritur në 474.606, pasi 6.876 njerëz më shumë rezultuan pozitivë në testet e virusit”, theksoi Ministria.
