Ministrja e Arsimit, Evis Kushi ka dënuar skandalin në Berat, sa i takon rikthimit në detyrë të mësuesit të dënuar për pedofili. Ministrja, me anë të një reagimi në Facebook thotë se është e pafalshme që persona të tillë të hyjnë qoftë edhe për një orë të vetme në mjediset e shkollës.
Kushi e mbyll mesazhin duke theksuar se do rishikojnë bazën ligjore dhe nënligjore, për të forcuar rregullat dhe procedurat e punësimit, apo shkarkimit të mësuesve. Kjo, për të mos lejuar që të ndodhin më raste që mund të përbëjnë rrezik për fëmijët.
Ndër të tjera ajo apelon ndaj të gjithëve, që të denonconi çdo rast që rrezikon të drejtat dhe sigurinë e fëmijëve në shkollë apo jashtë saj.
Statusi
Dënoj fort rastin e punësimit me kontratë të një mësuesi në Berat, që në vitin 2013 është dënuar nga gjykata për pedofili. Pavarësisht se gjykata nuk ia hoqi të drejtën e rikthimit në detyrë dhe të ushtrimit të profesionit, edhe pse prokuroria e kërkoi një gjë tillë, është e pafalshme që persona të tillë të hyjnë qoftë edhe për një orë të vetme në mjediset e shkollave tona.
Ky person është larguar menjëherë nga detyra dhe ndërkohë kemi nisur një hetim administrativ për të gjetur personin apo personat përgjegjës, që me neglizhencë apo paaftësi, nuk kanë marrë informacionin e duhur dhe kanë lejuar punësimin e tij. Për ta do të merret menjëherë masë ndëshkuese.
Për ne mbrojtja e nxënësve është e shenjtë dhe nuk tolerojmë askënd që cënon mirëqenien e tyre. Ndërkohë, ne në MAS do të rishikojmë menjëherë bazën ligjore dhe nënligjore, për të forcuar rregullat dhe procedurat e punësimit apo shkarkimit të mësuesve, për të mos lejuar që të ndodhin më raste që mund të përbëjnë rrezik për fëmijët tanë.
Ju lutem të gjithëve, prindër, nxënës, mësues, apo përfaqësues të komuniteteve, denonconi çdo rast që cënon, apo dyshoni se rrezikon, të drejtat dhe sigurinë e fëmijëve në shkollë apo jashtë saj.
