Në një prononcim për mediat nga selia e Partisë së Lirisë, ish-ministri i Bujqësisë, Edmond Panariti, ka folur për masakrën mjedisore në zonën e Shijakut, ku mbeturinat janë duke u djegur në hapësira të hapura. Sipas Panaritit, banorët janë të ekspozuar, pasi uji në puse do të kontaminohet, por ka edhe një ndotje të madhe të ajrit, tokës dhe ushqimeve. Ai ka ngritur alarmin për pasojat që ka shkaktuar edhe në periudhë afatgjatë skandali mjedisor në Shijak, ku janë djegur në mënyrë të paligjshme tonelata me plehra.
“Dramaciteti e gravitetit i asaj situate shkon përtej asaj që duket, shtëllungë toksike që ka qëndruar varur mbi kokat e banorëve për orë të tëra. Djegia e plehrave, burim i jashtëzakonshëm i një ndotje me pasoja për mjedisin dhe shëndetin e popullatës.
Ato mbeturina janë të paklasifikuara, mbetje plastike, vajra makinash, detergjentë, e mbeturina që në mënyrë kategorike nuk mund të digjen në ambiente të hapura.
Inceneratorët nuk punojnë, u gjet mënyra kriminale e djegies në mjedise të hapura.
Se çfarë ka në atë tym toksik, përpos se e them unë e kanë thënë studime të toksikologjisë, shkarkesa të dioksinave, toksinat më të rrezikshme të njohura deri më sot, të cilët nuk kanë vetëm komponentin e ajrit, kanë depërtuar në tokë në ujë e do dain në ujërat e puseve e ujësjellësave.
Dëm të jashtëzakonshëm jo vetëm të ajrit por edhe të tokës, ujërave nëntokëror dhe ushqimit.
Duhet të jetë një rast, duhet të marrë fund, duhet proceduar penalisht se ka dhe ligj që ndalon djegien e plehrave. Duhet vlerësim i ndikimeve në mjedis, pasoja afatgjata që krismat do ia dëgjojmë pas shumë vitesh, se bëhet fjalë për sëmundje shumë të rrezikshme, që dëmtojnë brezat, kërkohet analizë komplekse“, tha Panariti.
