Prokuroria e Posaçme kundër Korrupsionit dhe Krimit të Organizuar ka zbarkuar në zyrat e redaksisë së “Lapsi.al” e cila zbuloi skandalin me përdorimin e të dhënave personale të qytetarëve.
Mësohet se prokurorët e SPAK do të sekuestrojnë serverat e redaksisë, në kuadër të hetimeve të nisura në lidhje me këtë ngjarje.
Më herët, SPAK ka shkuar edhe në zyrat e PS dhe në institucione të tjera për të kërkuar databazën e të dhënave të qytetarëve që janë me të drejtë vote.
Prokurorët e posaçëm nisën hetimet pasi në media dolën të dhënat personale të qytetarëve, të cilët pretendohen se zotërohen nga Partia Socialiste dhe janë marrë nga institucionet shtetërore në mënyrë të pakligjshme.
Ndërkohë, Agjencia Kombetare e Shoqerise se Informacionit (AKSHI) ka sqaruar se të dhënat e qytetarëve nuk disponohen dhe nuk përpunohen nga ky institucion, e për rrjedhojë nuk ka si t’i jenë dërguar Partisë Socialiste.
