Edlira Naqellari dhe 8 te hetuarit e tjerë për tenderin abuziv me uniformat e Policisë së Shtetit do të dalin para Gjykatës së Posaçme të Apelit, në datën 30 korrik. Zyrtarët kanë apeluar masat e sigurisë lënë në fuqi në Shkallë të Parë, duke kërkuar zbutje të tyre, me argumentin se nuk ka kushte ligjore për të qëndruar në burg.
Ish-drejtoresha e Agjencisë së Blerjeve të Përqendruara Edlira Naqellari, në dëshminë e saj dhënë në gjykatë ka thënë se është e pafajshme, ndërsa shton se ende nuk e ka të qartë se cilin ligj ka shkelur.
Në deklaratën e dhënë për llogari të SPAK, Naqellari nënvizonte se me tenderin që ajo po realizonte, Policia e Shtetit do të vishej me uniforma siç duhej. Po kështu ajo ka shtuar se edhe vetë Drejtoria e Policisë së Shtetit nuk ishte e qartë se sa uniforma i nevojiteshin, sepse ka largime çdo vit dhe lëvizje numrash. 9 zyrtarë të Ministrisë së Brendshme akuzohen nga SPAK për shkelje te barazisë në tender, pasi ka dyshime për shkelje të rënda në tenderin prej 2.8 miliardë lekë.
Zyrtarët e Ministrisë së Brendshme kanë ndryshuar sasinë e uniformave, por jo çmimin prej 2.8 miliardë lekësh, duke shkelur hapur standardet e garës. 9 të dyshuarit Edlira Naqellari, Flutura Cekrezi, Anisa Bogdani, Ani Omuri, Kreshnik Bejkaj, Klevis Hasani, Fatmir Demneri, Gëzim Mingaj dhe Mariglen Buzali i janë drejtuar Gjykatës së Apelit dhe kërkojnë lehtësim të masave të sigurisë. Tetë të dyshuarit janë lënë në burg, ndërsa e dyshuara Anisa Bogdani shkoi nën “arrest shtëpiak”.
