Biznesmeni shqiptar, Klodian Mërtiri, ka reaguar për herë të parë për skandalin me korrupsionin e tenderit 60 milionë dollarë në Zimbabve, për pajisjet mjekësore kundër koronavirusit.
Përmes një deklarate për mediat, Mërtiri mohon të ketë lidhje me këtë kontratë korruptive. Biznesmeni shprehet se ky rast po përdoret qëllimisht për të krijuar skandal.
Kujtojmë se Partia Demokratike deklaroi sot në një deklaratë për mediat se Mërtiri është shpallur në kërkim ndërkombëtar nga Interpol. Por sipas biznesmenit të gjitha këto akuza janë të pabaza.
Reagimi për mediat i biznesmenit Klodian (Mirel) Mërtiri
Duke marrë shkas nga shumë publikime të bëra së fundmi në portale, media të shkruara dhe vizive, lidhur me emrin tim, unë Mirel Mertiri i datëlindjes 08/08/1978 deklaroj në përgjegjësinë time të plotë, se të gjitha spekullimet lidhur me implikimin tim në kontraten e përfolur në Zimbabve mes kompanisë Zviceriane Drax Consult Sagl dhe Natpharm janë të pavërteta.
Fotografitë e mia të publikuara gjerësisht në media, nuk kanë asnjë lidhje me kontratën në fjalë, por është përdorur qëllimisht për të krijuar skandal dhe dëmtuar reputacionin tim. Unë nuk jam Ilir Dedja.
Ditën e sotme kam ngritur Padi Penale per disa nga mediat të cilat kanë cenuar me dashakeqësi dinjitetin dhe integritetin tim me publikimet e tyre krejtësisht të pabaza.
Mirel Mërtiri
