Ish-Ministri i Mjedisit, Lefter Koka, u arrestua për aferën e inceneratorëve. Ai ndodhet pas hekurave nën akuzën e “korrupsionit” dhe “shpërdorimit të detyrës” në lidhje me abuzimet me çështjen e inceneratorëve. Në media po qarkullojnë me shpejtësi fotot e para të qëndrimit të tij në paraburgim. Koka shihet në ambientet e ajrimit, në paraburgimin e Tiranës, i veshur me të zeza.
Gjykata e Posaçme për Korrupsionin dhe Krimin e Organizuar pranoi kërkesën e prokurorisë për të vazhduar masën e sigurimit “arrest në burg” ndaj ish-Ministrit të Mjedisit, Lefter Koka, i arrestuar në 14 dhjetor në kuadër të hetimeve për koncesionin e incineratorit të Elbasanit.
Gjatë seancës për vleftësimin e masës së sigurisë të caktuar më parë nga gjykata, prokurori i Prokurorisë së Posaçme kundër Korrupsionit dhe Krimit të Organizuar, SPAK Klodian Braho u qëndroi kërkimeve të tij për lënien e Kokës në burg. Ndërsa përfaqësuesit ligjorë të ish-ministrit, avokatët Fatmir Braka dhe Julian Mërtiri kërkuan caktimin e një mase sigurime më të butë, për të cilën u shpreh dakord dhe i arrestuari.
Pas përfundimit të seancës që zgjati për më shumë se dy orë, avokati Braka u shpreh për mediat se i përfaqësuari prej tij, Lefter Koka është shprehur i pafajshëm në seancën gjyqësore. Ai evidentoi se Koka nuk ishte pyetur asnjëherë gjatë hetimeve, dhe e konsideroi si jo normale këtë fakt. Ai pohoi se fillimi i këtij procesi ka qenë politik.
