Menaxheri kryesori kompanisë “Gulf Oil”, Albano Aliko është shpallur menjëherë në kërkim nga prokuroria shqiptare pas falimentimit të kompanisë.
Sipas hetimeve të deritanishme rezulton se Albano është “koka” e skemës së mashtrimit të ngritur me tollonat e naftës. Kujtojmë se vetëm pak muaj më parë kompania ka shitur tollona deri në 120 lekë për litër, që është 25-40% më lirë se nafta që tregtohet në pikat e tjera të pakicës (165-178 lekë/litër), një skemë mini piramidë kjo, duke ua lënë tollonat në dorë konsumatorëve.
Nga hetimet paraprake Prokuroria e Tiranës ka zbuluar se menaxherët e “Gulf”-it, kanë shitur nëpërmjet tollonave shumë më tepër litra karburant nga sa ka patur në gjendje kompania me vetëdije. Ndonëse karburanti është shitur me vlerë të reduktuar brenda pak ditëve, dyshohet se nga kjo skemë janë mbledhur mbi 1,5 milionë euro.
Gulf, prej disa kohësh iu blinte furnizuesve të mëdhenj naftë me 1500 lekë litrin dhe shiste tollonë me 1200 deri në 1300 lekë litrin. Kjo vuri në lëvizje furnizuesit, të cilët nisën të kërkonin llogari, ndërkohë që detyrimi që “Gulf” kishte krijuar vetëm ndaj dy kompanive të njohura është 900 mijë dhe 700 mijë, gjithsej 1.6 milionë euro në total. Ndërsa dëmi që i krijoi klientëve, të cilëve u kanë mbetur në dorë tollonë pa vlerë, është 1.5 milionë euro.
