Real Madrid arriti një fitore bindëse në derbin e Madridit përballë Atleticos në “Ëanda Metropolitano”. Një ndeshje e luftuar nga të dy skuadrat, por që pëfrundoi me fitoren 3-1 nga të besuarit e Solarit. Ndërsa polemikat më të mëdha në këtë sfidë i krijoi VAR, që mund të thuhet dështoi plotësisht.
Fillimisht ishte braziliani Casemiro që shënoi një gol të bukur me roveshiatë për Realin, por vendasit u kundërpërgjigjen me sulmuesin e tyre. Griezmann shënoi pas një pasimi perfekt nga Correa, i vetëm përballë Courtois francezi ia kaloi topin mes këmbëve belgut dhe 1-1.
VAR ndali lojën dhe arbitri kryesor shkon të shohë aksionin sepse dyshohet për një pozicion jashtë loje. Pozicioni është i rregullt dhe akordohet gol. Mirëpo, në momentin që Correa merr topin shkakton faull ndaj Vinicius Junior, të cilin e godet direkt e në këmbë para se t’i marrë topin.
Ky moment nuk është parë në VAR, sepse rregullorja parashikon se në rastet kur arbitri anësor dhe ai kryesor nuk e ndalin lojën për faulle kur janë pranë aksionit, atëherë VAR nuk ka të drejtë të ndërhyjë.
Ndërsa nuk ka zgjatur shumë dhe ka ardhur gafa e dytë nga VAR, i cili i dhuron një penallti Real Madridit. Protagonist ishte sërish Vinicius, i cili driblon Gimenez dhe ky i fundit bën faull në kufij të zonës. Faulli duket qartë që nis jashtë zone, por arbitri edhe me ndihmën e VAR-it nuk ndryshoi mendim dhe e dha 11-metërsh, i cili u kthye në gol nga Sergio Ramos.
